經虛擬銀行買外幣會唔會着數啲呢?
根據理論,虛擬銀行無分行、所有嘢都網上、申請表都無一張,個Average cost-to-serve可以低啲,所以產品可以平啲、入場門檻低啲。
咁買賣外幣又會唔會着數啲呢?
有網友問呢個問題,咁有FX Trade嘅VB暫時嚟講就只有「富融銀行」一間(人民幣&美元only),咁今次就攞佢嚟做個簡單Comparison啦。
今次揀咗2020年12月31日13:30左右4間銀行「一般客戶」嘅外滙牌價,由於VB都係聲稱For「普惠金融」嘅,咁攞一般客戶價做比較都好合理啦係咪?
【2020銀行界十大大事回顧︰按此】
先嚟睇吓美金
上圖每一嚿都係代表一間銀行,最上條橫綫係Bank sell price,最下條橫綫係Bank buy price,個長方條嘅頂、中間個X係、長方條嘅底分別代表個Buy/sell spread嘅25%/50%(即係Mid-price)同埋75%。由底到頂愈闊,就代表個Spread愈大,即係銀行食水愈深喇。
咁如果大家純綷想知Customer buy price(即係你買美金個價),睇最頂就OK了。
【Mox「日日派息」真係着數啲?可以收多幾多利息?︰按此】
以上4間銀行分別係滙豐銀行(HSBC)、中銀香港(BOCHK)、建行亞洲(CCBA)同富融銀行(Fusion),但排行並不對應配圖順序,咁邊間係富融銀行呢?其實都唔係太重要,因為間間都差唔多,除咗左二紅色嗰間。
邊間食水咁深呢?我諗有番些少江湖經驗嘅Bank worker應該好容易估到,咪就係HSBC咯。呢個好似有少少違反一般人嘅認知,乜唔係市佔率大啲可以賣平啲咩?
錯錯錯!市佔率愈大、貨就賣得愈貴、毛利率就愈高,呢個係市場鐵則喇,大就係任性嘛,唔滿意嘅搬錢去細行度咯!就好似換成大型連鎖超市,就算我貴啲你又耐我咩嘢何?唔滿意可以去返雜貨鋪買嘛。
跟住就睇吓人民幣
咁人仔情況又如何呢?左二紅色HSBC就繼續食水最深啦,左一藍色就第二深,根據「銀行愈大、食水愈深」定律,呢間係BOCHK。
右二灰色同最右黃色係叮噹碼頭,一間Bank Buy Rate靚啲(即係最底條綫高啲),另一間就Bank Sell Rate靚啲(即係最頂條綫低啲),各有千秋啦。
咁邊間係富融銀行呢?答案係右二灰色,即係搵佢買人民幣會抵過BOCHK、HSBC同CCBA!
不過唔好開心住……
咁我建唔建議大家去富融銀行兌人民幣呢?答案係Yes/No啦!因為以上比較嘅都係「一般客戶價」,而只要你係尊貴客戶,好多時都會有得平。而自從取消咗最低存款之後,基本上只要你肯開個綜合戶口,再放些少錢落去,大家就好可能已經唔係一般客戶了(咁當然亦都唔會係最尊貴客戶啦)。
咁會平幾多呢?以上3間傳統銀行只有CCBA光明正大放晒上網,如果以最尊貴嘅價格比較,結論係暫時富融銀行係無競爭力的。But still again,睇吓大家攞個咩嘢價同主張「普惠金融」嘅虛擬銀行比較喇。
【富融銀行有咩服務解決ZA同Airstar嘅邏輯漏洞呢?︰按此】
退後一步,其實論FX市場虛銀又點會有競爭優勢?
雖然華田唔係做Treasury,都可以試吓扮吓專家,從炒房角度講吓。
大家知唔知道有咩嘢市場係24小時運作、兼且規模最大嘅呢?紐約股市?芝加哥期貨?
根據我嘅理解,答案係FX喇。對於一個接近單一、24小時運作、同時又極度有效嘅市場,所有參與機構Wholesale嘅成本基本上會非常接近,所以唔太存在甚麼「虛銀成本可以做得低啲」嘅講法。
去到Retail有啲銀行出價高啲、有啲低啲,好睇佢喺零售層面嘅佔有率,同埋基於大家嘅感情(你有錢畀我賺,我哋就有感情架啦),佢願意「讓」幾多畀你。
虛銀未來喺FX有無可能突圍?我唔多睇到有呢個可能喇,所以都係專心諗吓點存錢食雞好過啦。
【文章來源:華田銀行;已獲授權轉載。原題:銀行閑談 (103) — 經虛擬銀行買外幣會唔會著數啲呢?】
【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。
撰文 : Wallace Tin
欄名 : 華田銀行