ViuTV聽取民意腰斬《戰毒》下週一改播韓劇《上司實習生》

ViuTV原創劇《太平紋身店》於2月5日播映完畢，並由黃宗澤、吳卓羲及關智斌等人主演嘅外購合拍劇《戰毒》接棒播出，結果引起大量網民強烈不滿，紛紛到ViuTV社交網站專頁派嬲嬲及留言話要罷睇及洗版式要求ViuTV停播《戰毒》。去到噚日，ViuTV喺Facebook宣布下週一（22日）改播由朴海鎮、金應洙及韓智恩主演嘅韓劇《上司實習生》。

ViuTV接受傳媒查詢時就話《戰毒》將於本月20及21日（星期六及日）播出結局篇，而韓劇《上司實習生》就將於22日（下星期一）晚上9時30分播映。而根據ViuTV官網節目表，《戰毒》會喺今個星期一至五每日播一集，之後喺星期六及日晚上11點半至凌晨2點半連播3集。咁樣計落《戰毒》只係播出16集，咁其餘嗰14集呢？ViuTV就只係話沒有補充。

消息一出，唔少網民支持ViuTV順應民意，紛紛喺ViuTV Facebook專頁留言，例如：「支持ViuTV聆聽民意 ＃停播戰毒」、「說到做到，ViuTV你肯聽意見，我一定開返個電視睇」、「聆聽民意抵讚，所以下星期930一定會開番viu」、「貴台順應民意，從善如流。我哋會繼續支持」、「終於唔使嚟派嬲」、「聽民意要俾like la」、「好嘢！ #停播戰毒 ，順應民意！」及「終於回應觀眾訴求，感動！！！」等等。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！