身邊成日有人問我地，你地有乜動力去經營呢個channel? 我地聽到好多聲音好多意見，話MPF題材比較冷門，比較小眾，就算好多香港人要供MPF，但戶口入面的錢佔佢地的資產好少，所以都唔會CARE之類。佢地咁樣講有佢地的道理，但起碼佢地都有留意開我地，見到呢個題材的內容都引起咗佢地的關注。
其實MPF講到尾都係一堆基金，大家將筆錢係唔同基金度做資產分配，熟悉咗MPF，大家投資其他基金，一理通百理明，自然會有幫助。
戶口入面的錢佔佢地的資產好少，所以都唔會CARE? 如果係十幾廿年前，我可能都會認同呢個睇法，因為MPF當時才剛推出，大家戶口d錢自然唔多，但今時唔同往日，供咗十幾廿年之後，加上投資收益，已經唔再係小數目，所以只會愈來愈多人對MPF上心，不斷吸收知識，優化自己的投資策略。
其實我地不時會收到讀者的查詢，當中亦有百萬大戶的私訊，學海無涯，投資亦然，佢地身為百萬大戶，已經係眾人仰望的一群，都嫌不足，想力爭更高回報，呢種精神亦令人拜服。有D讀者佢地僱主好豪爽，只要你自願供多d落MPF戶口度，佢地僱主又肯match番你自願供款的某個百分比落去你個MPF戶口度，當僱主個部份係額外賺架話，咁即係未開始投資已有幾成收益了，所以佢地MPF戶口對佢地個人財務而言，變得相當重要。
高手在民間，我地呢個channel其實也只是拋磚引玉，我地都唔希望只係我地係咁講，大家做CDrom，查實大家如果能夠互相分享，互動留言，做到教學相長，就最好啦，希望大家睇完片睇完靚女，額外袋到d野落袋，我地的動力來源就係咁簡單。
經營呢個channel有樣好，就係會令你好有動力去睇啲基金資料，除咗有一班志同道合的朋友一起研究，有個咁既氛圍會事半功倍外，youtube上載的每一條片都係一個紀錄，當中應承咗大家，想幫大家發掘研究的內容，包括大家留言區的要求，每睇一次條片，就好似追魂call咁一次又一次咁提醒你去做，咁你話又點會無動力呢。
暢所欲言之後，今日就要入正題了。大家睇完匯豐兩條片後，一定有發現到我地最尾留咗條尾巴係度，今日就係要繼續講落去。上次講匯豐入面的基金，就SKIP咗佢隻增長基金，唔係唔講，因為呢隻野係全港MPF第5大資產規模的基金，咁鬼大隻，咁多錢買咗，四月底有成312億元資金買咗佢，如果夾理恒生個邊增長基金的近98億元，就超400億元，咁大點可能唔講呢? 仲要重點攞出黎講。
如果你係買咗呢隻基金的朋友，除咗「增長」兩個字之外，呢隻基金的股債比例、底層基金有D乜、投資咗D乜野國家、買咗乜野股份，你又知唔知? 呢隻基金又應該同乜野基準指標去對比佢的表現? 咁多年回報係點? 風險有幾高，收費有幾貴? 隻基金到底好唔好？有無D風險與收益更好的基金? 諸如此類的問題，你又答到嘴嗎?
咁我地就要搵下資料先，由股債比例開始講，呢隻基金係屬於混合資產類別基金，據MPFA的資料分類，係將佢列入81%至100%股票的混合資產類別，即係佢會投資81%-100%係股票度，其餘就係債券、現金等，簡單而言，即係絕大部份係投資係股票度。但我地睇番呢隻基金的詳細資料，佢債券、現金等其他投資的佔比，其實係講得鬆好多，寫明可以去到最多30%，咁即係佢的股票比例係由70%至100%，而唔係MPFA組別寫的81%-100%，咁樣佢的投資自由度就會大好多，當遇上大股災時，可以調去現金的比例都會比組別其他基金的多。
至於佢D底層基金係D乜? 我地見到呢隻基金係買入匯豐的APIF(HSBC MPA ‘A’- Growth Fund)，而呢隻HSBC MPA ‘A’- Growth Fund就係買入兩隻或以上的其他APIF或ITCIS。如果大家對APIF或ITCIS呢兩個TERMS感到好陌生，咁一定要睇番我地之前拆解黑箱作業條片。
簡而言之，你當呢D係D底層基金就得了。即係你買咗一隻強積金嘅基金，而這隻基金再買落去嘅其他底層基金。
咁這隻匯豐嘅增長基金到底即係買咗D乜底層基金呢？同大部份嘅匯豐強積金嘅基金結構一樣，供款人買嘅強積金基金會單一買入一隻匯豐自家出品嘅底層基金，但因為佢啲自家出品嘅底層基金唔係對外公開發售，所以買入左啲乜嘢其他嘅基金呢，就無公開文件畀大家睇到。
但我地可以見到，佢話佢隻基金主要係分散投資係環球股票上，而側重會係亞洲市場。我地睇番隻基金的詳細的國家分布先，佢真係相當側重係亞洲股票，睇番2021年3月底的國家分布，當中中國及香港股票有成29.4%，日本股票有12%，其他亞太股票有11.9%，加埋已過半了，至於美國股票就有18%，歐洲股票有19%，股票合共的比例去到90%以上，另外6%係環球債券。頭四大持倉都係大家熟口熟面的港股，騰訊、阿里、友邦、美團，合共9.7%。其實其他嘅增長基金都好相似，佢地都係會投資約30%喺中港地區。
如果你本身其他投資已持有大量港股及中資股的話，呢隻基金有近30%又投資番落中港度，咁你就要自己衡量下，自己的整體組合夠唔夠分散了，係唔係自己心目中想要的配置比例了。至於單獨買入一隻混合基金好，定係買入基金來自己混合好呢，就繼續留意我哋啦，嚟緊我哋再同大家拆解。
至於喺2021年3月底嘅時候佢投資嘅股票同債券比例係接近九成投資喺股票上邊，而有近6%左右投資係囉環球債券，仲有少量現金同埋存款等。債券嘅比例就比去年2020年底輕微提升咗少少。參考同一平台上嘅其他基金嘅操作，相信佢嘅債券會係主要投資喺債券ETF，或者直接持有美國英國等國家嘅國債。
想投資梗係離唔開會有風險啦。
呢隻基金的風險標記係15.9%，而風險級別係6，我地之前有片同大家講呢兩粒數係點理解，風險級別愈高，隻基金的回報波動就愈大。由於佢的回報波幅的年化標準差係介乎係15%至25%，跟番個表配對番，佢的風險級別就係6，都係屬於較高風險的基金類別。但都未上到最高風險的第7級，但其實整個MPF市場上400幾隻基金，最高都係6級，暫時未見7級，即係大家都將基金的波動年化標準差控制係25%樓下。但大家唔好忘記，呢隻基金係最高可以投資到30%係債券上邊嘅，但喺呢個風險指標就同一啲只買股票嘅股票基金一樣喇。
我地又同其他增長基金比較下，係MPFA度，81%至100%股票的混合資產類別的基金，合共有19隻，咁我地見到4月底，吸金最勁個5隻，即係基金資產值最多嘅增長基金，分別係屬於匯豐、宏利、中銀保誠EASY CHOICE、友邦、同埋宏利富達，隻隻都係巨無霸超百億元規模。
但睇返呢個類別，喺年初至到四月底，整個類別都係有走資嘅現象，今年頭四個月整個類別走資咗近15億元。而當中匯豐嘅增長基金就走資左近7億 ，連埋恒生平台上嘅增長基金又走資左近2億，佔咗整個類別既走資既大部分。
呢個類別有兩隻的風險級別特別低，包括宏利的 富達增長基金，同埋BOCIP的我的增長基金，風險級別比其他低咗一級，咁低風險D，有無低回報D? 呢兩隻短線，如一年期都比平均略低，但由推出至今計起的年率化回報，就遠勝類別平均了。即係長線唔單止風險低D，仲要回報高D，咁筍? My Choice我的增長基金，最近期基金開支比率低絕同類別，得1.05%，收費低D都有助谷高D回報，而宏利隻富達增長基金，收費就唔低，1.78%，高過類別平均的1.61%，但長線回報都做到好過類別平均，咁就更加靠佢的基金的投資回報了。
大家唔講唔知，其實my choice既我的增長基金，宏利嘅富達增長、友邦既富達增長，加埋中國人壽，同埋富達強積金平台上既增長基金，其實都係買入同一隻底層基金，但係因為收費唔同，就引致有唔同嘅回報啦。所以大家放係強積金d錢就要睇清楚，好可能係畀緊唔同嘅費用，但買入同樣嘅底層基金。至於點解買入同樣嘅底層基金，但有一啲風險標記高啲有啲低啲，就有機會再同大家研究一下。
咁匯豐隻增長基金，收費係1.5%，雖然比最平的1.05%高唔少，但比最貴的AIA增長組合的1.97%都低唔少，而且都低過類別平均，回報方面，截至4月底一年回報係38.93%，同類別平均的38.82%差唔多，推出至今的年率化回報就係4.66%，遠遠唔及富達增長基金的7.6%，同My Choice我的增長基金的7.9%。
如果你話大家推出的年期唔同，想同D 2000年一齊推出的基金去比較的話，咁佢回報都係尾三，最尾個隻係永明強積金綜合計劃增長投資組合，年率化回報得4.42%，尾二係信安增長基金，4.54%。如果你2000年開波買入的係富達退休集成信託的增長基金，受託人同樣係匯豐，但表現就最好，年率化回報有成6.33%，真係小數怕長計，廿年落黎回報可以差近倍架啦。
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
