葵芳

葵涌廣場、葵芳地鐵站，以及新都會廣場之間，為葵芳繁忙地帶

葵芳地鐵站望出葵青劇院。右方為新都會廣場，左方為貨櫃碼頭工廠地，遠方為葵盛

重建後葵芳邨。葵芳邨為葵芳起源地。

葵芳（Kwai Fong），香港新界嘅一個地方，因葵芳邨而命名。行政而言，屬於葵青區入面，葵涌嘅下葵涌。建設而言，係荃灣新市鎮嘅一部份。地方平坦，都係填海得來。

北面𡰪𡰪，叫葵興，出自葵興邨，亦為填海地。連接葵興葵芳嘅道路，叫興芳路。西北有山，因為葵盛邨而叫葵盛。而葵芳之南，為葵涌貨櫃碼頭相連工廠地。葵芳之東係原本葵涌村地農地，後有葵涌道相隔，唔少化成工廠地，一般叫大連排道工業區。再向東南就係山地，為九龍到大帽山之山脈，山上有青山公路。

葵芳原為葵涌填海地，原本成塊地都叫葵涌。有葵芳邨之後，近邨就叫葵芳。葵芳邨西有個細嘅墟市，之後起咗地下鐵路，有咗葵芳地鐵站、又有咗私人屋邨新葵芳花園，依一帶就日漸興旺。葵芳地鐵站西面，有兩大商場，葵涌廣場同新都會廣場，係現今葵芳最旺嘅地方。一般而言，葵芳並不包括工廠地，嗰啲都係葵涌名下，但有時由於無顯著地名，方便指示時亦會叫葵芳。

葵芳有葵涌運動場，為荃灣新市鎮主要運動場之一。葵涌劇院，亦為葵青區主要文娛場所。亦有室內體育館，叫林士德體育館。

道路

葵芳對外主路，為葵涌道，南去九龍，北去葵涌北部。葵涌道北端為昌榮路廻旋處，可通去大窩口、荃灣同沙田等地。

另一條主路，叫興芳路，去葵興同葵盛。興芳路，南駁葵青路，可以去青衣。葵青路經葵青交匯處，可上荃灣路，去荃灣、屯門等地。

葵福路為駁通荃灣同荔景嘅路，經過葵盛同葵芳。由於路過葵盛山地，路稍為曲折。東南端駁通荔景山道。是為去荃灣去荔景嘅主路。