MIRROR專訪︱成軍兩年回味難忘時刻 Stanley重提負評坦言想放棄

MIRROR專訪︱成軍兩年回味難忘時刻 Stanley重提負評坦言想放棄

撰文:陳芷穎
出版:更新:

「一起相聚,一起鬥咀,一起經歷壯舉」是MIRROR兩周年團歌《One And All》的歌詞,亦印證了12位男生如何從寂寂無名的素人一直走到今天,有他們的舞台就總會有一班忠實的「鏡粉」為其吶喊歡呼。成軍兩年,MIRROR將一切看似不可能的任務逐一完成,出道短短個半月就舉行首個演唱會。正當時下年輕人推崇「韓流」K-Pop之際,他們卻成功重燃本地久違的追星潮,屬於香港的偶像男子組合MIRROR用行動證明,熱血追夢的故事唔單只是電視情節。
訪問當日,10位男生(姜濤、Ian因拍劇未能出席)嘻嘻哈哈重提出道至今很多的第一次。回想起出道當日的商場演出、第一次演唱會發生大大小小的事情,時至今日依然記憶猶新。言談間,他們經常互窒鬥嘴,一時取笑柳應廷(阿Jer)肥、一時又笑指邱傲然(Tiger)長高了一點,聆聽着每一位說出兩年間相處的故事,大概就會明白這12位大男孩是如何從比賽的競爭對手變成今日互相扶持的戰友。
撰文:陳芷穎
攝影:梁碧玲
Wardrobe:D Mop
Makeup:Rainbow & Giann @Annie G.Chan Makeup Centre
Hair:Lydia Yung, Man Chan, Leo Fan @Chic Private I Salon

訪問當日,10位男生嘻嘻哈哈重提出道至今很多的第一次。回想起出道當日的商場演出、第一次演唱會發生大大小小的事情,時至今日依然記憶猶新。(梁碧玲攝)

01最賞睇娛樂大獎」即日起至12月23日接受投票喇,答埋簡單問題,隨時贏最新5G手機12 Pro!

2018年11月MIRROR正式出道 第一次以男團身份表演

2018年11月3日是MIRROR正式出道的日子,回想起第一次以男團身份踏上舞台、唱着屬於他們的第一首歌曲《一秒間》,加上無數「鏡粉」在台下歡呼吶喊,「緊張」就足以概括他們當日的心情。盧瀚霆(Anson Lo)擔心表情不夠,緊張到只懂傻笑:「臨上台前,花姐叫我哋一定要笑,嗰時緊張到上台剩係識笑。兩年後再跳返就唔會剩係傻傻地笑,會夠膽放多啲情緒落去。」連一向自信心爆棚的江𤒹生(AK)都因為要記舞步而變得緊張:「喺後台好緊張,前一日仲排緊《一秒間》嘅舞蹈,啱啱去學去跳。」

當成員們都擔心台上的表演有甩漏時,唯獨邱士縉(Stanley)害怕與台下粉絲互動。事關Stanley由參賽時被評判的一句「只留意到Stanley的胸肌」以及星座論,就為他惹來不少負評,更令他一度懷疑「冇人鍾意自己」。其他成員興奮落台與粉絲合照聊天,他卻選擇默默走回自己的舒適區—後台:「台上面唔係最驚,最驚係台下面對Fans。要派卡片時我去返後台,好怕佢哋會避開我眼神,想去返舒適啲嘅位置就係後台。而家多咗隊友支持信心會大啲,兩年過去,我更加享受同Fans嘅互動。」

MIRROR創下出道時間最短開演唱會的香港男團,這個壯舉對他們來說可算是小小的奇蹟,亦成為每位成員心中永不磨滅的美好回憶。(梁碧玲攝)

出道個半月即開首個演唱會 回味每個窩心時刻

出道短短個半月,MIRROR於12月21日在九龍灣國際展貿中心舉行《2018 The First MIRROR Live Concert》,創下出道時間最短開演唱會的香港男團。這個壯舉對他們來說可算是小小的奇蹟,亦為每位成員創造了永不磨滅的美好回憶。縱然當中充滿不安、緊張,但隊員間的打氣就成為了隊長楊樂文(Lokman)的最大支柱。

回想起當日出場前的互相鼓勵,以及粉絲震耳欲聾的尖叫聲,Lokman流露出滿足的笑容說:「臨升上去台面Standby時,大家作最後一個鼓勵然後去各自位置準備,嗰一個力量唔係握完手就冇,係帶埋大家嘅力量升上去,呢個感覺唔知點形容。最勁係戴咗Earmon本身唔係好聽到出面發生咩事,但Fans係大聲到戴住Earmon都聽到有幾嘈,嗰一下就知要畀盡全力。」

回想起當日出場前的互相鼓勵,以及粉絲震耳欲聾的尖叫聲,Lokman流露出滿足的笑容。(梁碧玲攝)

最令AK感動的是演唱會後眾人攬着經理人花姐,累積的壓力彷彿一掃而空:「演唱會完咗之後,一落台大家即刻衝去花姐度攬埋一齊。11月3號去到演唱會得一個月,中間經歷咗好多工作,其實真係好攰,好多嘢唔識消化。完咗演唱會個人終於鬆一鬆,就衝去花姐度攬住佢,呢一刻好感動。」

王智德(Alton)當日亦因為心煩一度怒火中燒,全靠隊友的安撫才令他冷靜下來:「演唱會好早已經喺場館做準備,有朋友不停問我買紀念品,叫我幫手買。我俾人問到好心煩,嗰時唔識控制呢樣嘢,開始發脾氣、打牆踢牆,佢哋第一時間攬住我,自此之後就知我唔可以發脾氣,我之後去咗睇鐵打。」陳瑞輝(Frankie)說演出時褲子差點鬆脫,全憑成員在台上Buy Time幫他一把:「我條褲鬆過三次,直頭係甩褲,《ASAP》我都係抽住條褲跳。台上面嘅佢哋就撐咗好耐,上到嚟好想攬住佢哋,幫我Buy Time令件事冇失禮。」

Frankie演出時褲子差點鬆脫,全憑成員在台上Buy Time幫他一把。(梁碧玲攝)

Jeremy成MIRROR最後一員 決賽放手一搏終獲肯定

《全民造星》令12子走在一起,參賽期間共同經歷無數個通宵奮鬥的晚上,每個回合的相聚分離、相擁痛哭,令他們更認定彼此的存在。花姐亦一早有意要組成MIRROR,身份十強之一的李駿傑(Jeremy)卻遲遲未收到簽約通知,失落再加上不服輸的心態,令他在決賽中放手一搏,最終取得MIRROR的最後一席位:「作為MIRROR最後一個加入嘅成員,決賽時已經知道MIRROR嘅存在,但我知道自己冇入。會諗自己同佢哋比差咗啲咩,有少少唔服氣,決賽時點都要表現最好嘅自己出嚟,就係靠個表演令自己有入MIRROR嘅機會。」

重提決賽時的表演,Jeremy更因花姐的一句「加油」而淚灑當場,眼淚包含着不甘不忿、對自己的懷疑,卻從沒萌生過放棄念頭:「我靠努力同堅持入到十強,我唔要失去最後Show到自己嘅機會。第一個表演上台前,花姐同我講『加油』兩個字,我就爆喊停唔到,中間好多情緒,覺得冇機會入MIRROR,十強入面又唔係最叻嗰埋人、人氣又唔係最高,好多原因令到情緒好唔穩定。」

花姐一早有意要組成MIRROR,身份十強之一的Jeremy卻遲遲未收到簽約通知,失落再加上不服輸的心態,令他在決賽中放手一搏。(梁碧玲攝)

「夢想唔可以當飯食」 Stanley:想放棄時諗返點解你要開始

熱血的追夢路途必然經歷低潮與挫折,呂爵安(Edan)還記得宣布十強後所面對排山倒海的負面批評,令他上了寶貴一課:「宣布十強後Facebook好多人鬧,大家嗰時比較鍾意B組。好多人話『呢個死盲公怪相咁都入到、反白眼唔知乜水,完全冇記憶點』,好多呢啲Comment,點都會唔開心。當時心態係決賽要證明自己值得呢個位置,人生一定會經歷低潮,要識得面對壓力同負面批評。」

熱血的追夢路途必然經歷低潮與挫折,Edan還記得宣布十強後所面對排山倒海的負面批評,令他上了寶貴一課。(梁碧玲攝)

「夢想唔可以當飯食」,的確夢想與現實還是要拿一個平衡。年輕時可以無拘無束盡情追夢,但當人漸漸長大開始有負擔時,難免要從夢想中抽離。在MIRROR中屬於大哥哥的Stanley坦言不時就會有放棄念頭,之不過在放棄時別忘提醒自己當初為何開始:「時不時都會諗放棄,疫情、市場、香港又可以諗下。喺台灣都有同Anson Lo傾未來,做呢行有好多未知,有好多因素會令你諗放棄,要睇自己點捱過。但放棄咗一定冇,當你想放棄時要諗返點解你要開始。」

點撃睇大量專訪靚相:

+34