Ming仔鄭敬基師徒情深
YouTube人氣王Ming仔最近勇奪YouTube年度最佳網絡節目獎，原來背後有位啟蒙恩師，他就是不少人由細睇到大的鄭敬基。兩師徒相聚接受訪問，爆發無窮的創作力！
Ming仔（右）與鄭敬基在加拿大結緣，關係亦師亦友。
勇於接受挑戰的Ming仔，希望有機會擔任電影導演。
Ming仔感謝鄭敬基的提攜，而對方亦大讚Ming仔為人不計較。
身為YouTube紅人的Ming仔與鄭敬基（Joe）兩師徒在加拿大電視台結緣，當時Joe是Ming仔的上司，私交甚篤，後來Ming仔離開公司後跟上潮流自拍短片，以輕鬆搞笑方式論盡時弊，怎料一拍即深受網民歡迎，迄今共獲千多萬的點擊率。早前更榮獲YouTube年度最佳網絡節目獎，可謂現今炙手可熱的YouTuber之一。雖然瞬間爆紅，但Ming仔相當懂得飲水思源，他除感謝Joe當年的提攜，又表示從他身上獲益不淺，而Joe亦對Ming仔有讚冇彈，指他為人非常「抵得諗」兼不會斤斤計較，認真師徒情深！
主意多多
轉眼間，Ming仔與Joe不約而同從加拿大回流返港，昔日僅僅在家無聊自拍短片的Ming仔，現在發展愈趨成熟，更在九龍城自置一個約700多呎的Studio，開設製作公司，與員工合力為夢想打拚，他說：「嚟緊有人搵我做電影導演，其實呢個都係我其中一個目標，不過現階段都係洽談當中。」化零為實，Ming仔憑一己之力愈來愈接近銀幕觀眾，真是一個不可小覷的後起之秀。
而80年代出道的Joe，1998年憑《烈火雄心》司徒拔一角深入民心，他表示當年為了不想錯過子女的成長階段而毅然到加拿大發展，現時他們長大了，於是安心回流，問到回歸無綫後有甚麼期望，他說：「我內心團火仲未熄o架！希望觀眾未忘記我，我會以黎耀祥做目標，向視帝進發！」兩師徒果然同樣主意多多，又雄心壯志！
