Miss Hunny裸湯溫泉引仔
網上人氣高企的Miss Hunny以「魔術美少女」之名進軍寫真界，吸納大批宅男Fans。早前，她與另一網絡紅人Ming仔到日本拍特輯，更裸浸溫泉，引得Ming仔大讚「嗒得杯落」！
Ming仔及Miss Hunny即席扮賭神及刀仔拍照，鬼主意多多！
本身是魔術師的Hunny靠甜笑俘虜不少宅男。
Ming仔4年前開始放片上網並火速走紅，在網上有數十萬Fans。
網絡紅人Ming仔（梁嘉銘）及Miss Hunny（何穎璇）是本地瀏覽量最高的其中兩名YouTuber，他們愛以生動有趣的手法拍片，分享對不同話題的看法，每段短片至少有10萬Fans撐場！兩人最近獲邀到日本拍攝特輯，趣事多籮籮！
這兩位「靠把口搵食」的當紅YouTuber受訪時頻頻鬥嘴，起初仍客套互相抬舉，Ming仔讚Hunny鏡頭前後同樣搞笑：「佢外貌甜美，笑得燦爛，同佢度嘢真係好開心！」Hunny則笑說：「佢嘅優點？冇呀！多雀斑同眼細，睇嘢集中啲！不過，佢話晒都係『YouTube小王子』！」
遇「程咬金」阻獵食
Hunny早前推出寫真，憑甜美笑容吸納大批Fans，當中穿和服浸浴的照片更噴血程度爆錶！Ming仔在片中疑似看到Hunny全裸浸溫泉，問到其「觀後感」？他似乎不太欣賞並笑說：「我勁恐懼！依家仲有陰影，講笑啫！佢唯一唔專業係打太多底，欺騙觀眾呀！（睇過佢本寫真？）好好吖！佢唔出聲係嗒得杯落嘅！」雖然朝夕相對的日子長達7天，但兩人異口同聲表示沒有日久生情，更搞爛Gag笑稱不會「人狗生情」，Hunny又說：「我哋傾嘅嘢係冇內容，暫時未交到心，不過比較難搵到呢類無聊朋友！」問到旅程中是否有艷遇？她即有怨言：「諗住識番個靚仔，點知Ming仔成日黐住晒，阻住我！」Ming仔聞言立即反擊：「預咗你冇！畀你賴吓我啦！」
