Ming仔是誰 而網友都知道

每隔一段時間，網上就會有一些短片被瘋傳，好似上月聖誕期間就有令人震驚的「Boxing Day大戰」；雖然好多人一心諗住靠短片出名，但更多人換來的卻是反效果，看「頭文字B」便知一二。不過，甲之砒霜、乙之熊掌，有人真的可以一躍成為網絡紅人。有這樣一個人，上載了第一條短片到YouTube，瞬即得到幾十萬點擊率，最高瀏覽人次達百幾萬，訂閱人次更是全港第三，紅到離晒譜！甚至有人找他合作拍片、MV、搞宣傳等，真係恨都恨唔到。

那誰咁厲害？之唔係YouTube人氣王Ming仔，問問你身邊，總有幾個朋友睇過佢啲片，Like過佢嘅Facebook。事實證明只要有心機，不用下下Chok樣，都有人知道你是誰。

很多事情都要講天時地利人和，Timing唔啱往往令你錯過好多嘢，Ming仔勝在懂得把握時機，「幸運地」比別人行早一步。作為年輕人，想講時下熱話，他懂得找有趣的渠道，以誇張生動的方式上網「齋」……咪住，未睇過這條片？依家可以即刻去睇吓，你將會見到他又自戀、又王子病，連一班「飛輪海頭」朋友都講埋，真係唔怕得罪人，奇妙之處在於他並無因此畀人起底狂插，反而因為中Point又夠抵死，獲得大眾的掌聲，一舉成名，更為他帶來無數工作機會。

Ming仔的經歷，叫人明白到，想做就去做，一「諗吓」就輸了，即使做咗唔得都叫有做過！「只有自己喜歡的事情，才有Passion去做！」Ming仔找到自己喜歡的事去努力，你呢？

陪朋友見工入行

雖然自拍短片成功獲得合共千幾萬的網上點擊率，不過當初Ming仔就如大部分人一樣，無諗過自己會入行。早年與家人移民到加拿大，Ming仔「人有我有」地修讀經濟學，完全無想過自己要做甚麼，朋友話電視台請人，一心只想做兼職的他，便陪朋友一齊去見工，又係最老土嗰種「其實係陪朋友去」的經歷，結果有人請之餘，更愈做愈有興趣，後來「無端端」轉做全職，無他嘅，鍾意就自然肯花時間心機。Ming仔說：「平時我份人都幾計較，又幾懶，但呢份工又好少令我計較，最後更由兼職變全職。」呢啲咪真心喜歡囉！

創意無窮的Ming仔，曾在電視台擔任多個崗位：報天氣、記者、新聞配音、攝影、剪片、編劇、節目導演、監製，最後連幕前都做埋，Ming仔笑說：「因為電視台規模細，養唔起一班淨係做幕前的人，所以當時差不多所有幕後的同事，都擔任埋幕前工作，透過偶然的機會，便發掘了自己真正的興趣。」就是這樣，在學時期的Ming仔已經找到喜歡的路，不用浪費時間。

裁員兩次幾度回巢

似乎前路早已選定，但不代表易走，Ming仔在電視台懷着滿腔熱誠工作，卻遇上裁員潮：「當時我的直屬上司是鄭敬基，一直以來他也很幫我，我被裁走之後，佢不停在老闆耳邊提起我，提到老闆都話佢，惟有放棄；後來公司開新節目，老闆竟然主動提起我，於是我又回去。」在電視台只工作短短4個月，然後失業1個月，回巢後竟然躍升為監製兼導演，一切十分順利，加上他肯做肯捱，連被視為「豬頭骨」的任務都照單全收，本以為前途無可限量，豈料……

1年多後裁員潮再度襲來，當時Ming仔心想自己乜都肯做，應該不會輪到自己，結果再次「中招」，其實公司沒有說要炒他，卻要求他做40小時工作，人工只計13小時，以Ming仔的「計較性格」，無論如何不能妥協，他笑謂：「在加拿大攞失業救濟金都多過佢，點解要接受不合理的薪金？」於是Ming仔再次加入失業大軍陣營。

被肯定感覺良好

Ming仔一邊量地，一邊想搞些新搞作，既然自己喜歡做製作，不如自己拍片，講生活、講感受，諷刺社會現象，估唔到咁就畀佢得咗。「由心而發，主題其實都圍繞自己，短片都以此為中心，希望以真實、節奏快，又能諷刺到事實為主，完全無諗過會响香港熱起來，甚至紅返去加拿大，被人肯定的感覺很好。」你可能會問，人人都可以拍到呢啲片，做乜佢會咁紅，Ming仔答案係：「時機。」咁啱被裁員、咁啱係興趣、咁啱Hit中人心、咁啱又算係頭一批去玩拍片的香港人（雖然拍片時身在加拿大），好似其爆紅短片《每天自戀多一些》，片內講自戀男周圍照鏡，見鏡就照、又怕頭髮被吹亂，雖然好似好誇張，但周遭又真係有呢啲人存在，平時你見到都真係想「中」佢，而Ming仔正好代大家發聲，更用抵死生鬼的方式表達，叫人會心微笑。

有幾多人可以被同一間公司裁了兩次，還可以再被聘請？Ming仔就可以，正正因為佢條片爆紅，後來他竟然再次被聘請，連老闆都話他是唯一炒咗兩次、請咗三次的人，或者就正如Ming仔深信，世上沒有懷才不遇。唔知Ming仔係唔係怕第三次被裁員呢？正如小記一貫做人宗旨，係被拋棄前先自己離開比較好，所以他返回電視台工作半年後，便自行告退，返港尋機會。

一腳踢完美主義

拍得出一條關於「自戀」的短片，或多或少也有一點自戀吧？他說：「我唔係自戀狂，但都會有少少自戀，因為這樣才會有自信，我為自己所做又成功而感到開心，炫耀一下亦無妨。」由幕後製作，跳到幕前演出，在網片的圈子奠定位置，Ming仔沒有為自己定型，反而希望作多元化嘗試，現時偶爾見他出現在各大媒體，MV男主角都撈埋。不過，他坦言自己未能做到Team Work：「自己的作品都是一手一腳做，由度橋、拍攝、剪接統統包辦，因為自己先最清楚自己想點，咁先係最完美。」不過，近來Ming仔都開始跟人合作，好似跟文恩澄拍MV、與一班網友成立香港互聯網創作及藝人協會等，希望可以用自己的力量幫助其他志同道合的人，更加可以推廣二次創作文化。

自覺未夠全面的Ming仔，暫時會全面接不同類型工作，又會繼續與不同人合作，但終極目標原來是在40至50歲時，成為出色的電影導演或監製，更以《潛行空間》導演Christopher Nolan為目標：「日後唔知自己可以去到咩位，但自己鍾意做導演，因為自己鍾意嘅事可以自己控制，希望去到Christopher Nolan一半已經好好！」雖然未有機會睇Ming仔執導的電影，但他形容為最值得期待的本年度新作快將推出，今次更會同人合作，仲話條橋「好得」添短片將於未來幾天上載，睇吓今次又有幾爆！

About Ming仔

80後的Ming仔（Tommy Leung），早年與家人移民加拿大，在當地拍第一條短片《每天自戀多一些》成名，成為YouTube香港區最多訂閱的第三位，短片總觀看次數有千多萬。年多前回流返港，現時積極參與各類型演出，並繼續拍攝其個人短片系列，更與一班志同道合網友合辦香港互聯網創作及藝人協會，集合更多愛無聊、愛分享、愛惡搞的網路創作人，一同分享及交流。