創業雜談
搣時潘嘅問題出喺邊？
搣時潘係喺香港嘅personal brand之中，一個好有趣嘅例子。她前幾年開始成名，由經營補習社轉行成為「網紅」/KOL，其中一環收入來源似乎係透過網上販賣性感照片。
早幾日她出咗事。
據講Miss Pun應邀到一間酒店同一名騷擾佢嘅狂迷會面，期間做咗啲疑似係凌辱呢位疑似弱智和藍絲的狂迷嘅行為，滅時潘隨後被捕同被控「破壞公眾體統罪」。
Miss Pun因此事惹來多方抨擊，我想喺度講一講Miss Pun作為一個personal brand有啲咩問題。
Social norm使然，老師同性感網紅呢兩個形象有矛盾
不如我地問下自己一個問題：
「點我地唔鍾意林作？」
「點解我地唔鍾意法律超人謝偉俊？」
In林作嘅case，律師嘅專業形象，同「離經叛道」、「語出驚人誓不休」嘅譁眾取寵風格有違和。
In謝偉俊嘅case，超人嘅滑稽形象亦同律師形象有衝突。
即使林作依家已經不再做律師，就算係做保險和做補習天王，都需要比人可信感覺（credibility）、專業同合理嘅感覺（proessionalism同reasonableness）。
口出狂言，唔會比人感覺你有以上特質。
呢啲暗黑marketing可以令你變成城中熱話，令你出名，但對你生意幫助可能好細，因為暗黑marketing，未必能夠令客戶信任你。
(另，根據林作Facebook所講，真係有班人好buy佢，佢生意真係有因為西裝事件提升，當然絕對唔能夠排除佢係刻意製造話題，令人留意，亦唔可以話 no publicity is bad publicity 呢句說話係冇道理，都係個句，你有冇比人笑同比人鬧嘅勇氣，要有強心臟，你先好用暗黑marketing。）
Miss Pun嘅問題，唔在於著得少布，教壞細路
我當然唔認同Miss Pun拍啲性感照會教壞細路，一般人天生出黎（到某個年齡）就有性慾，鹹濕嘅人就算冇Miss Pun嘅性感相睇，自己都識得去PornHub同其他地方搵。
當品牌定位有違和感，同social norm有衝突，你需要好強嘅論述能力
Social norms are not necessarily right or wrong, but they’re always there. 社會規範唔一定係啱定係錯，但社會規範確實存在。
Like it or not，social norms會好影響whether or not大眾buy into你個image。
冇錯，Polarising（兩極化/富爭議）嘅形象會令你成名好快，就好似車志健先生咁，但當你惹非議上身，你要確保自己有強心臟處理得到，同埋你要好有公關智慧駕馭得到，如果唔係只會高處不勝寒。
冇咁大個頭，就唔好戴咁大頂帽；自己處理得到，先好惹是非上身。
如果Miss Pun選擇咗影性感相呢條路，佢應該要知道現實黎講，再行番老師條路係好難，因為大眾嘅perception唔容許。
喺香港，保守嘅人唔少，其中保守之中最最保守嘅，就係家長族群同教育界。
「Miss著衫性感會教壞我細路」呢個觀念，當然唔理性，但事實就係係有一大群家長就係覺得：「Miss著得咁性感，影性感相，教壞我細路。」
大眾，亦都唔係理性嘅。
如果Miss Pun決意defy呢啲家長同大眾嘅期望，繼續補習又行性感路線，唔係絕對唔可以，但佢需要好強嘅論述能力。（雖然，事實係佢好似唔會再做番補習。）
而以下我會講到，Miss Pun似乎冇咁嘅能力，又或者佢有，但從來冇bother論述啲咩。
Miss Pun似乎缺乏論述能力，推廣女性自主
以我所認知，女性自主係主張女性有權利決定自己點樣展示自己嘅身體，佢地應該對自己嘅身體擁有自主權，而不應該受制於社會的框框或定型，換句話講係gender stereotypes。
呢啲框框/定型（stereotypes）包括：
- 女生唔應該太性感；
- 女仔如果擁有超過一個性伴侶就不是一個好女仔；
- 女仔不應，同時或前後，擁有過多的性伴；
- 女性不應該覺得自己的身體要合乎社會的美學標準（例如瘦、玲瓏浮凸等）才愛自己的身體等；
- 女生不可以透過販賣自己的身體牟利等。
Feminism（女性主義）最簡單的詮釋就是性別平等，簡單講，
就係主張：
- 假如男仔可以𥄫女，女仔亦自然可以𥄫仔；
- 假如男仔可以擁有多性伴侶為傲，女生亦應該可以；
- 假如男仔可以享受性，女仔也應該可以享受性。
Miss Pun教中文嘅，語文能力照計唔低，但呢啲嘢，我就從來冇見佢有講過。
或者，佢係想做一個模特，而唔係想做一個opinion leader，但唔夠智慧，但成日話其他人智商有問題，好似冇咩說服力。
Miss Pun冇帶領女性explore female sexuality，佢嘅相只係展現到佢嘅自我物化，冇展現到女仔嘅sexuality
在Miss Pun的相片和文字，我只見到透過male gaze睇到嘅性感嘅Miss Pun，我睇唔到Miss Pun展現的female gaze。
或者咁係因為Miss Pun講過，佢自己其實冇咩性慾，但完整嘅female sexuality唔係應該包含享受被男性欣賞同睇到，亦都應該係包含埋自己渴望睇到同欣賞男性咩？
Miss Pun喺電視節目上面話自己冇咩性慾，唔鍾意「搞野」，男朋友嘅性需要都係由自己解決，難免令人覺得她對female sexuality缺乏認識，只係一個模特兒，而非一個具有領導同教育大眾能力的KOL。
外國一啲嘅KOL，對於female sexual empowerment做到嘅嘢，真係強過Miss Pun好多。
Miss Pun放性感照喺社交媒體同賣相，當然可以係對stereotypes的無聲控訴，可以講係係用緊自己嘅身體defy緊social norms。但係Miss Pun嘅控訴似乎至於無聲嘅控訴，做唔到論述。
其實Miss Pun拍性感相嘅初衷係咩？佢究竟想點？
當網民問：Miss Pun同Emilia Wong點解要拍性感相？
佢地往往就係回應話：「我鍾意。」、「你唔鍾意大可以唔睇」、「你要睇但又要罵我地係臭雞，係想點？」、「我只係覺得why not？」
做一樣嘢，原來meet到why not呢個test就做？
咁why yes呢？Emilia Wong同Miss Pun其實識唔識得答？
網民無理，唔代表Emilia和Miss Pun有理。
佢地從來冇講清楚：
究竟點解佢地點解要拍性感相呢？
係純粹為賺錢？
係因為生活裡面缺乏溫暖，為咗得到被like被愛嘅感覺？
係想教育大眾？
有人話，鍾意唔需要理由，或者Emilia同Miss Pun都會咁講。
而我相信：
The heart has reasons that reason itself cannot know. — Blaise Pascal
我地鍾意做一件事，一定有理由，當然呢個理由未必容易解釋。
如果人地問到你做一件事嘅原因，你只會話：「我鍾意呀！」，而缺乏論述，咁樣好難怪別人覺得你只係一隻任性嘅小學雞，因為你唔了解你自己，你解釋唔到你自己，你defend同justify唔到你嘅價值觀。
即使當網民做到理性咁批評Miss Pun，佢識唔識得理性咁回應呢？
我講得explicit啲，如果Miss Pun同Emilia Wong話，因為我可憐有班男人下面痕，想幫下佢地，我覺得都叫做有個原因丫，但佢地真係冇。
回應唔到why yes，所以Miss Pun做唔到sexy and smart。
美感同品味問題
我們喺社交媒體上post嘅內容，都係narrative，每一個post，每一份內容，都喺度講緊比人聽我地品位係點，我地嘅價值觀係咩，我地嘅personal story係咩。
Miss Pun嘅照片性感與否，我相信看官自有定論，喺我角度睇來，Miss Pun的照片只是穿的少布而已，未必稱得上性感。
看著Miss Pun的Post，我喺度諗：Miss Pun心目中嘅性感係咩呢？
係咪就係少布？或者係意淫咁舐雪條？
性感，唔等於舐雪條，如果覺得性感就係舐雪條，咁係好膚淺嘅美學。
你問香港人：張曼玉性感嗎？鍾楚紅性感嗎？張國榮性感嗎？當然性感，但張國榮、張曼玉和鍾楚紅嘅性感都唔需要以「舐雪條」嘅方式暗示或明示。
佢地性感，係因為打扮，因為氣質，因為性格，因為佢地嘅言行舉止。
咁的性感，當然比較難駕馭，亦唔會咁快吸引到眼球，但亦都能夠做到含蓄、經典，樂而不淫同襟睇。
計算你未必有張國榮、鍾楚紅嘅顏值，你都可以靠你嘅美感同視野，做到smart、sexy同independent嘅形象。
睇下Too Hot to Handle嘅性感尤物Francesca Farago，她喺IG上嘅相都冇好似Miss Pun咁平面。
畫面可見，Francesca有善用自然景觀同身後建築物的線條、光影等自己嘅相不只做到hot，仲做到富有美感。
Francesca亦更加懂得擺Pose，性感照又唔只係其他人操刀拍攝，也有自拍照，充分展現女性自主；相反Miss Pun給人的感覺，就是單純的自我物化。
當然，即使美感唔夠強，Miss Pun嘅相一樣大賣，但一個帳戶富有美感，定係缺乏美感，確確實實會影響到觀眾質素，也實實在在地話緊比人聽我的品位高低。
Miss Pun唔識得保護自己
撚藍絲固然危險，撚任何人都有危險性，更何況係上酒店同任何陌生人會面。就算係潛意識希望坐監避世，都應該要自愛。
我明白Miss Pun自上年以來，一定承受咗好多，被起底和長年騷擾嘅感受絕不好受。假使我係佢，我也不敢擔保我必然能夠承受，不被仇恨支配。
但如果要做好KOL/半公眾人物的工作，必須有自量的能力，如果沒有強心臟，沒有能力處理大壓力，就不要做太多惹來非議、是非的事，
要做大事，影響世界，就要先照顧好自己，冇事先做到世界冠軍。
報復唔等於公義
我唔係道德潔癖，話以牙還牙一定唔啱，而係撚藍絲，唔代表可以移風易俗，亦唔代表可以教育到佢，令佢明理。撚一個人冇教育效用，只可以講勉有機會做到retribution，做唔到rehabilitation同education。
總結
一個personal brand，應該有佢代表嘅價值，Miss Pun呢個personal brand，代表緊咩價值呢？
似乎唔係女性自主、獨立，似乎更加多人只係覺得佢空虛、desperate for love and likes，甚至係幼稚同naive。
做過啲research，Miss Pun似乎有唔少被bully嘅經驗，再加上細個屋企環境缺乏愛，或者就係咁，就造咗一個悲劇。
如果希望看到我更多的分享，歡迎追蹤我的其他頻道：
YouTube: https://youtube.com/finniesmarketing
Instagram: https://www.instagram.com/finniesmarketing/
Facebook: https://www.facebook.com/finniesmarketing
《如何開始創作內容，建立個人品牌》精華筆記: https://bit.ly/3aFNY7i
🎧 收聽 Podcast: https://apple.co/39XqFW9 (Apple Podcasts) / https://spoti.fi/36iq1Ba (Spotify)
