〖片段由JOOX提供〗

Edan（呂爵安）噚晚舉行「JOOX TOP聽推介年度新人Edan呂爵安線上音樂會」，邀請埋好兄弟Jer（柳應廷）做嘉賓，近50分鐘嘅演唱，就吸引超過4萬多名網民線上睇騷。

鍾意聽國語歌嘅Edan，開場就揀咗近期熱爆電影《月老》嘅主題曲《如果可以》，之後先唱自己嘅《小諧星》。嘉賓Jer則揀咗好朋友湯令山嘅《勁浪漫超溫馨》。Edan提到 2020年時做過Jer音樂會嘅嘉賓，當時自己心情超緊張，因為花姐講過如果唱得唔好，唔會畀佢出個人單曲，「不過老實講，今晚冇嗰晚咁緊張，因為有阿Jer，Jer神喺到。」

Edan更認真話：「係好感觸嘅，嗰時到而家都相隔一年多，自己係有好多嘢唔同咗！」Jer就讚Edan唱功有大躍進。Edan亦好識做，即幫Jer新歌《MM7》宣傳，仲問Jer點解其中一句歌詞嗌「come on」，Jer反問:「係咪好有型呢！」

Edan話有一日睇到MIRROR嘅日程表，見到Jer要去排舞，莫非新歌Jer要跳舞？Jer話：「呢個秘密嚟，諗住挑戰下舞王Anson Lo（盧瀚霆）嘅舞王位置。」當然Jer話挑戰Anson Lo只係講笑，佢話想睇佢跳「十字步、開心舞」就要留意2月4日MV嘅播出嘞！

至於噚日係《E先生連環不幸事件》推出一周年，歌曲監製Edward亦有現身音樂會，Edan自爆當年錄咗8次，咬字發音又唔正，要監製教好多次，就連唱副歌，因唱唔到，要逐句唱逐句錄，難為了監製。Jer提議Edward將當日Edan錄音花絮片公諸同好，而Edward有講公道話，讚Edan而家錄歌進度快咗好多。

期間網民留言叫Edan分享同Jer綵排趣事，Edan就話Jer爆粗，搞到Jer即話：「邊有呀，我冇講呢啲嘢，粗口咁核突我唔講㗎！」Jer即反爆Edan，身為音樂會主角綵排都遲大到，Edan一臉無奈話：「今朝我去咗針灸呀，我去咗睇醫生呀，OK！」不過，Edan就冇多講解釋咩事要去針灸。

之後Edan同Jer首次合唱《一表人才》同《12》，Edan話今晚揀選嘅歌都係自己近日喜歡嘅歌曲，除《小諧星》、《E先生連環不幸事件》、《如果可以》，亦有唱咗MC張天賦嘅《時候不早》送畀歌迷。回顧 2021年Edan話：「開心呢一年學咗好多嘢，亦知道自己有好大進步空間，希望新一年大家陪住我繼續進步同努力。嚟緊新歌就會新嘅嘢，但唔會咁快透露住，會係好圓滿同幸運一年。」

完成音樂會之後，Edan接受訪問嗰陣話係第一次自己嘅音樂會，難免有啲緊張，「第一次自己孭重飛，唱咁多首歌都有啲緊張。」佢話算滿意自己嘅表現，將自己最好嘅都攞咗出嚟，但仲有好大進步空間。坐喺Edan隔離嘅Jer都加把口話：「我見到佢好緊張，因為完咗騷之後係咁睇大家嘅comment係咩。」

問到2022年嘅目標，Edan就話好多謝歌迷們嘅支持，「無論係MIRROR嘅fans定係自己嘅fans都好錫我哋，想有更多人認識我哋，先Keep住聽我哋嘅歌，我哋真係好幸運。」Jer聽到呢度都忍唔住問：「所以2022年唔出歌喇？」Edan即時話：「唔係，所以我哋一定要對得住大家呢份支持，繼續出更加多好嘅作品畀大家。」佢仲話希望年中有MIRROR嘅演唱會添！

歌曲方面，Edan 2022年想有新嘅曲風，同Solo第一年唔同，不過就話唔劇透住；而Jer就話自己會繼續返系列，「系列之中亦都會有啲side track，我自己好想玩嘅音樂，我都唔劇透係咩，大家會見到全新嘅阿Jer。」

Fans們如果錯過咗今次演唱會，之後係可以再去JOOX重溫Jerdan嘅演出，不過詳情就要等官方公佈喇。

====================

更多《田木集作》嘅片，可以喺呢度睇到

YT：https://www.youtube.com/c/田木集作

IG ：https://www.instagram.com/touchwoodtv/

FB：https://www.facebook.com/touchwoodtv

====================

#JOOX #Edan #呂爵安 #Jer #柳應廷 #MIRROR #JOOXTOP聽推介年度新人音樂會

#田木集作 #田木 #touchwoodTV