近日有網友留言問，亞洲基金同亞太基金有乜分別? 地區聽落都差唔多，相信好多人都未必分得清呢兩隻基金。
首先大家要知道MPF d基金都有基準指數(benchmark index)，FTSE同MSCI就MPF各類基金都出咗一系列既指數。大家平時想比較基金表現，可以用絕對回報同相對回報去睇。絕對回報係好簡單咁睇升咗幾多%，賺咗幾多錢。如果想對比基金做得好唔好，就要睇相對回報，相對回報可以同同類別去比較，或者同FTSE同MSCI的benchmark index去作比較。大家可以直接攞自己買咗的基金同FTSE、MSCI既同類index去比，咁就知自己的基金經理有無創造價值，你畀的fee到底畀得值唔值。
講番亞洲同亞太基金，我地可以嘗試由呢d基準指數的國家分布，去睇清亞洲基金同亞太基金的主要分別係邊度。不過要留意，Mpf d基金如果唔係追緃指數的被動型基金，即係主動型個批，佢地的country allocation可以大幅偏離 benchmark架。
如果我地睇番d benchmark index，你會發現，ftse無隻叫亞洲基金，只叫亞太基金，佢將Asia pacific分咗幾條，Asia Pacific ex Japan、Asia Pacific ex JP, AU & NZ、Asia Pacific ex Japan & Hong Kong、Asia Pacific ex Japan incl. HSBC呢幾條。其實Ftse名係叫asia pac但其實係有隻亞洲，就係Asia Pacific ex JP, AU & NZ。
講開又講，點解Asia Pacific又要ex Japan既，ex即係exclude咁解，一般的解釋係因為asia pacific內大部份都係發展中的國家同地區，而japan係比較成熟的經濟體，咁d想買asia pacific的投資者主要係想買高風險高回報的發展中國家，所以d asia pacific index通常會ex咗japan出黎。
咁講番亞太基金的國家分布先，我地用FTSE MPF Asia Pacific ex Japan Index黎說明，係2020年10月底，條index最大比重的國家都係中國，佔咗31.74%；第二大係澳洲，佔15.03%；第三大係台灣13.99%；跟住係南韓12.63%、印度10.21%、香港8.35%，其他仲包括泰國、新加坡、馬來西亞、菲律賓、紐西蘭。十大持倉有3隻中國、3隻澳洲、1隻台灣、1隻香港、1隻印度、1隻南韓。而最大持倉的個股就係香港上市的騰訊(700 hk)，但country佢就當咗中國，隻阿里巴巴同美團都係當中國。呢個就係富時asia pacific的大概分布。
咁MSCI的Asia Pacific又如何? 佢條指數叫MSCI MPF AC Asia Pacific ex Japan，2020年12月底有成748隻成份股，中國又係佔比最大，佔34.05%；澳洲佔14.65%；南韓佔13.93%；台灣佔12.98%；印度佔9.56%，其他佔14.83%。你會見到，無論係ftse或者MSCI的asia pacific都係主力買中國、澳洲、南韓、台灣同印度，呢五個國家係ftse佔83.6%，係msci就佔85.17%。
所以簡單而言，Asia Pacific就係買重中國、澳洲、南韓、台灣同印度呢五個國家。而當中中國的佔比係非常大。而中國大部份係香港上市既中資股。
講完亞太，就到亞洲基金。咁ftse mpf Asia Pacific ex JP, AU & NZ，即ftse變相的亞洲基金，又買咗咩國家？睇圖可以見到，佢重磅中國同台灣，分別37.3%同16.7%，再加埋香港10%，三地合共64%！再加印度12%，南韓15%。
咁我地睇埋條MSCI MPF AC Asia ex Japan Index，佢有676隻成份股。睇圖可以見到，主力係中國，接近40%、南韓17%、台灣16%、印度11%、香港10%，合共佔92.76%。好明顯會見到，亞洲基金係無咗亞太主力的澳洲，而且亞洲基合比亞太基金的國家更加集中，中國的比重更高。睇埋十大持倉，頭兩隻股票，亞洲基金同亞太基金其實都係一樣買緊個兩隻，就係台灣的tsmc同中國的騰訊。
咁亞洲定亞太近期回報好d? 睇番Mpf組別的類別回報，2020年亞洲（日本除外）類別平均回報27.52%，而亞太（日本除外）類別平均只有18.69%，比亞洲低得多，主要係畀澳紐拖累。當中亞洲基金最勁的係Allianz隻Asia fund，一年升45.8%！好鬼勁！我地遲d開片講，大家記得subscribe咗我地channel先。
呢個就係benchmark index亞洲同亞太指數的主要分別喇。如果按積金局的MPF fund platform的分類，又無分到咁細，亞洲同亞太都係係同一個fund category下面”equity fund- asia”。而且唔係間間供應商都會有齊兩隻畀你揀，大部份都係出一隻，一係就亞太，一係就亞洲，只係間Principal有整兩隻，Scheme Series 800就係亞洲、Simple Plan同Smart Plan就係亞太。Principal係歷史原因先有晒兩樣，因為simple同smart plan係買返來。所以整體而言，大家用緊的大部份供應商，都唔需要你自己去諗買亞洲定亞太，因為大部份得一隻。
好似宏利咁，佢出的係亞太股票基金，你如果唔想買澳洲股票，想入亞洲基金多過亞太基金的話，佢就無啦，你留番係呢間供應商就唔會有呢個產品。睇番宏利MPF亞太股票基金，佢的國家分布比例同基準指數多少會有出入，但都係主力係中國、澳洲、韓國、台灣、香港同印度，分別係21.5%、17.5%、13.9%、13.9%、12%、9.5%。因為係MPFA download的fund fact sheet係舊至2020年3月的數，所以同指數的出入會更大。
最後，要留意番的係，上面講的亞洲同亞太只係按基準指數黎睇，只係一個大概的concept。如果隻基金唔跟基準指數玩，又鍾意自己亂叫亂改名，鍾意叫亞洲就叫亞洲，叫亞太就叫亞太，你都無佢符架。所以，最好千祈唔好淨係睇名去買。我地又舉個反面的例子，好似AIA隻亞洲股票基金，你可能會預期無澳洲，no，sorry，截至2020年5月底的fund fact sheet顯示，呢隻基金主要投資於亞太區(日本及香港除外)，佢雖然個名叫亞洲基金但投資係亞太區呀，所以大家要睇清楚呀，而且佢的亞太區因為寫明香港除外，我地發現佢連中國都無呀。佢係買重咗澳洲30.81%、南韓21.21%、台灣19.08%、印度16.43%、所以都係個句，唔好只睇名呀。好多名不副實的基金，我地之前都有片同大家講過，未睇的朋友可以click入右上角呢條link去睇番。其他仲有咩亞洲基金係咁，我地下條片有機會再詳細講。
簡單而言，直接睇自己買咗的基金的國家分布，同自己的心水係唔係脗合，好過睇名。今日就講到呢到啦，其他留言我地都會盡量解答，畀d時間我地呀，謝謝。鍾意我地channel的朋友，快d like, share同subscribe，有乜çomment歡迎隨便留言。
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
