Frankie認收通知MIRROR不出席年底頒獎禮：好可惜！

男團MIRROR成員Frankie（陳瑞輝）今日（23日）現身家品活動，吸引過百皮寶寶（粉絲暱稱）到場支持，談到有傳MIRROR將缺席年底各大音樂頒獎禮，他表示也有聽聞：「有問過公司，因為MIRROR演唱會喺一月，所以時間可能用喺排練演唱會，等公司安排。（覺得可惜？）可惜，安排到都想去，但始終表演好重要，好多嘢要排練，一直都覺得演唱會做得唔夠好，將時間放喺排舞上重要啲。」

他表示早前到大阪旅行5天，都是到一般旅客景點，問他沿途沒有被人認出？他笑謂：「都有人認得我，不過冇主動要求合照，好享受今次旅行。（入MIRROR後第一次旅行？）之前都有去過馬爾代夫，由我出世之後一直都話會沉，點都要去一次，不過之後都唔知幾時可以再放假。」他指近期主力排練音樂劇，因還有數個星期便要表演：「最難仍然係唱歌，要唱出感情同原因，會同拍過MV嘅隊友取經。」