【Sally出遊】金鐘奢華酒店新優惠　海景房staycation食足4餐

好耐冇見大家喇！冇辦法，Sally同大家一樣冇得飛，日日宅喺屋企，不過近日Sally發現有唔少香港酒店推出Staycation優惠，除咗住宿仲包餐飲，雖然有排未去得旅行，住吓酒店都可以有度假feel。好似Sally最近就入住咗「港麗酒店」（Conrad Hong Kong Hotel），Package包括海景房住宿，仲食足4餐，其中一餐更加係浪漫燭光晚餐，啱晒情侶或夫婦想慶祝紀念日。雖然Sally未有另一半，但都玩得盡興，即睇Sally超詳細入住報告！

住宿優惠包乜？

擁有30年歷史、位於金鐘嘅Conrad就唔使多介紹啦，佢係本地其中一間最著名嘅五星級奢華酒店，而今次同旅遊網站合作推出嘅package收費$2,800（已包服務費），包括入住海景住宿客房一晚、雙人早餐、行政貴賓廊下午茶和黃昏雞尾酒，以及「Nicholini’s意寧谷」或「Brasserie on The Eighth懷歐敘」4道菜雙人晚餐（價值$1,954），仲可以提早11點入住、延遲2點退房，最長可以住足27個鐘。坦白講，齋睇價錢其實唔算平，但平日入住Conrad基本房型都要$2,500一晚，今個package算係好罕見。

Sally入住當日被安排到57樓嘅海景房間，因為夠高，前面完全冇大廈阻擋，景觀開揚，可以睇到180度無敵海景同天際。Sally自己都飛唔到咁高，梗係要喪打卡啦！至於房內設計以較柔和嘅金黃色做主調，具奢華氣派得來又唔會太土豪feel，充滿東方古典韻味。

沐浴用品採用「上海灘」的產品，不過最令Sally驚喜嘅係佢哋支牙刷，刷毛十分軟熟，平時Sally最驚酒店牙刷硬到大力少少都會刷傷牙肉……

酒店嘅服務都好貼心，除咗有奢華酒店必備嘅水果盤、朱古力同熱茶迎賓，近黃昏時段仲有「開床服務」，即係幫你鋪好床鋪準備晚上休息。如果你發現枕頭唔夠舒服，仲可以要求酒店換過另一款。

（圖左）食完個Tea返到房就見到鋪好床仲放埋毛墊、拖鞋喺床邊，感覺窩心。（圖右）房內仲有隻熊仔和鴨仔，可以帶返屋企留為紀念。

房內有免費Nespresso咖啡及Tea WG茶包，至於其他汽水零食就要額外收費。

免費tea set＋任飲紅白酒

今次package其中一個賣點係可以入行政酒廊嘆tea set同黃昏雞尾酒時段，其實兩個時段係相連，如果自問係大胃王可以連食2餐，唔係嘅話，Sally會比較推薦黃昏雞尾酒時段，因為可以任飲紅白酒和cocktail，易回本之餘，食物選擇亦比較豐富。至於下午茶則有3層架，比較適合打卡，而且甜點較出色，所以睇下你個人喜好啦。

下午茶於下午3時至5時供應，有3款甜點、3款鹹點及英式鬆餅，Sally覺得鬆餅、吉士脆卷和咖啡閃電泡芙最好食，大家亦可點咖啡、果汁等飲品。

行政酒廊拎食物嘅空間唔算大，加上因為推出咗package，周末人頭湧湧都幾逼。至於因為疫情關係，酒店要求客人拎食物時必須佩戴口罩。

觀賞夜景嘆浪漫晚餐

今次package嘅重點梗係浪漫燭光晚餐，Sally揀咗「Brasserie on The Eighth懷歐敘」食法國菜。餐廳設有指定4道菜menu，而每道菜都可以2選1，網上預訂時已經可以睇到，不過去到餐廳菜式都有少許調整，但基本上轉變不大，例如主菜採用嘅魚類唔同咗。如果想再有氣氛一啲，你亦可額外加配wine pairing（每位$220/2杯、每位$280/3杯）。

而食物方面，Sally同朋友除咗湯品一齊嗌咗龍蝦湯之外，其他我地都各點唔同菜式，所以基本上試勻成個menu。其實菜式唔算好特別，但勝在用料上乘，當中「法國鵝肝伴焦糖士多啤梨」及「烤牛柳配朝鮮薊醬」就最好食，鵝肝表層香脆，內裡質感細滑帶滿滿油脂，配焦糖士多啤梨同多士一齊食剛好平衡膩感，而烤牛柳就好juicy，而且肉味香濃。