【Sally出遊】金鐘奢華酒店新優惠 海景房staycation食足4餐 | LINE TODAY | LINE TODAY

請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

【Sally出遊】金鐘奢華酒店新優惠 海景房staycation食足4餐

LINE TODAY 發布於 2020年06月18日08:43 • 想飛的sally

好耐冇見大家喇!冇辦法,Sally同大家一樣冇得飛,日日宅喺屋企,不過近日Sally發現有唔少香港酒店推出Staycation優惠,除咗住宿仲包餐飲,雖然有排未去得旅行,住吓酒店都可以有度假feel。好似Sally最近就入住咗「港麗酒店」(Conrad Hong Kong Hotel),Package包括海景房住宿,仲食足4餐,其中一餐更加係浪漫燭光晚餐,啱晒情侶或夫婦想慶祝紀念日。雖然Sally未有另一半,但都玩得盡興,即睇Sally超詳細入住報告!

住宿優惠包乜?

擁有30年歷史、位於金鐘嘅Conrad就唔使多介紹啦,佢係本地其中一間最著名嘅五星級奢華酒店,而今次同旅遊網站合作推出嘅package收費$2,800(已包服務費),包括入住海景住宿客房一晚、雙人早餐、行政貴賓廊下午茶和黃昏雞尾酒,以及「Nicholini’s意寧谷」或「Brasserie on The Eighth懷歐敘」4道菜雙人晚餐(價值$1,954),仲可以提早11點入住、延遲2點退房,最長可以住足27個鐘。坦白講,齋睇價錢其實唔算平,但平日入住Conrad基本房型都要$2,500一晚,今個package算係好罕見。

酒店位於太古廣場,交通便利。

Sally入住當日被安排到57樓嘅海景房間,因為夠高,前面完全冇大廈阻擋,景觀開揚,可以睇到180度無敵海景同天際。Sally自己都飛唔到咁高,梗係要喪打卡啦!至於房內設計以較柔和嘅金黃色做主調,具奢華氣派得來又唔會太土豪feel,充滿東方古典韻味。

對住無敵海景瞓覺,冇得輸!
浴室嘅空間好闊落,有兩個洗手盆同超大浴缸,另設企缸。
沐浴用品採用「上海灘」的產品,不過最令Sally驚喜嘅係佢哋支牙刷,刷毛十分軟熟,平時Sally最驚酒店牙刷硬到大力少少都會刷傷牙肉……

酒店嘅服務都好貼心,除咗有奢華酒店必備嘅水果盤、朱古力同熱茶迎賓,近黃昏時段仲有「開床服務」,即係幫你鋪好床鋪準備晚上休息。如果你發現枕頭唔夠舒服,仲可以要求酒店換過另一款。

熱茶與水果(圖上)、枕頭menu與可插USB為手機充電的鬧鐘。
(圖左)食完個Tea返到房就見到鋪好床仲放埋毛墊、拖鞋喺床邊,感覺窩心。(圖右)房內仲有隻熊仔和鴨仔,可以帶返屋企留為紀念。
晚上可觀賞美麗夜景。
房內有免費Nespresso咖啡及Tea WG茶包,至於其他汽水零食就要額外收費。

免費tea set+任飲紅白酒

今次package其中一個賣點係可以入行政酒廊嘆tea set同黃昏雞尾酒時段,其實兩個時段係相連,如果自問係大胃王可以連食2餐,唔係嘅話,Sally會比較推薦黃昏雞尾酒時段,因為可以任飲紅白酒和cocktail,易回本之餘,食物選擇亦比較豐富。至於下午茶則有3層架,比較適合打卡,而且甜點較出色,所以睇下你個人喜好啦。

行政酒廊位於59樓,同樣可以欣賞海景。
下午茶於下午3時至5時供應,有3款甜點、3款鹹點及英式鬆餅,Sally覺得鬆餅、吉士脆卷和咖啡閃電泡芙最好食,大家亦可點咖啡、果汁等飲品。
黃昏雞尾酒時段是下午5時至7時,有自助小食提供,仲有指定紅、白酒無限量供應。
設有吧枱即點即調雞尾酒或無酒精雞尾酒。
對於鍾意飲酒嘅朋友而言,黃昏雞尾酒時段絕對係回本嘅重點。
行政酒廊拎食物嘅空間唔算大,加上因為推出咗package,周末人頭湧湧都幾逼。至於因為疫情關係,酒店要求客人拎食物時必須佩戴口罩。

觀賞夜景嘆浪漫晚餐

今次package嘅重點梗係浪漫燭光晚餐,Sally揀咗「Brasserie on The Eighth懷歐敘」食法國菜。餐廳設有指定4道菜menu,而每道菜都可以2選1,網上預訂時已經可以睇到,不過去到餐廳菜式都有少許調整,但基本上轉變不大,例如主菜採用嘅魚類唔同咗。如果想再有氣氛一啲,你亦可額外加配wine pairing(每位$220/2杯、每位$280/3杯)。

一邊燭光晚餐,一邊觀賞夜景,好有氣氛。

而食物方面,Sally同朋友除咗湯品一齊嗌咗龍蝦湯之外,其他我地都各點唔同菜式,所以基本上試勻成個menu。其實菜式唔算好特別,但勝在用料上乘,當中「法國鵝肝伴焦糖士多啤梨」及「烤牛柳配朝鮮薊醬」就最好食,鵝肝表層香脆,內裡質感細滑帶滿滿油脂,配焦糖士多啤梨同多士一齊食剛好平衡膩感,而烤牛柳就好juicy,而且肉味香濃。

焗蠔伴菠菜(左)、法國鵝肝伴焦糖士多啤梨(右)
烤牛柳配朝鮮薊醬
精選雪葩及雪糕(左)、朱古力慕絲(左)

翌日雙人自助早餐都係去行政酒廊享用,雖然嗰度空間唔大,但總算有齊中、西式早餐,包括蒸點、粥品、麵包、cold cut、焗薯、乳酪和水果等,仲可以落單嗌各式雞蛋料理和雲吞麵,即叫即做,整體食物質素不俗。

望住藍天白雲食早餐,心境特別寧靜。
同樣拎食物嘅空間唔大,但有齊基本款式,而且每款食物擺放出來嘅份量唔多,廚房會keep住refill,食物更新鮮。
值得一提嘅係有幾款麵包放喺焗爐保溫,食落更加香脆鬆軟。
仲有個secret menu可以嗌雲吞麵,不過Sally驚食唔晒,嗌咗「走麵」,雲吞足料彈牙,至於味道不過不失,未算好驚艷。

酒店嘅泳池同健身室都有開放,不過Sally諗住落雨就冇帶泳衣游水,結果係冇落雨,搞到都有啲後悔。由於今次有咁多餐要食,為咗保持嬌小體態就去咗健身室做下運動。

健身室設備齊全,不過因為限聚令而有部分器械暫停使用,相信好快會重新開放。

總括而言,今個package有海景房再包1日4餐,而且除返開每人$1,400,平時食一餐fine dining都唔止呢個價錢,情侶和夫婦嚟慶祝紀念日係個唔錯嘅選擇,不過如果純粹想搵個地方平平地度下假,遠離一下煩囂就未必適合,可以等Sally遲啲再同大家報告其他Staycation優惠啦!

香港港麗酒店
地址:香港金鐘道88號太古廣場二期
電話:2521 3838
網址:ConradHongKong.com