【一路向北】香港唔再吸引 年青一代更愛北上消費?
發布時間: 2019/04/26 18:17
最近城中熱話一係「安心偷食」,一係剛剛上映嘅美國荷里活猛片《復仇者聯盟4》,早前預售時,首日戲飛已經極速售罄,一票難求,網上仲有炒價飛出現。於是有網民就話「香港無得睇,咪去深圳睇囉」。其實從呢句,積臣睇到嘅意思係香港人消費嘅習慣轉變緊。
事實上,近幾年香港班年輕人都唔抗拒北上消費。網上更興起一班KOL,專門拍片講深圳食玩樂好去處,最近興大灣區「概念」,更有一班大灣區KOL唔只拍片講深圳、廣州好去處,更介紹埋中山、順德等二、三綫城市。
其實香港人一直以來都有北上消費習慣,上一代會北上飲飲食食,仲會按摩同尋花問柳,但而家後生一代,特別係90同00後,佢哋追求美食之餘,仲追求美侖美奐嘅打卡景點,具文青、藝術風格嘅網紅店、文創區最受歡迎。喺前幾日,《鏗鏘集》就探討香港年輕人北上消費習慣,其中提到有年青人更會每星期去深圳一次,北上深圳其實已成為部分年輕人嘅假日消閒地方。
背後更反映咗深圳發展迅速,以前就會話深圳未夠現代化,未畀到香港人信心,又或者根本無地方好去,但而家深圳嘅商場數目正高速興建緊,《鏗鏘集》有提到舊年年底深圳已經超過150個商場,而且每個商場、店舖空間大,畀到香港人較舒暢嘅感覺,咁地方大,自然就會多啲「花臣」、多啲特色主題嘅店舖,例如係福田區皇庭廣場店嘅「盒馬鮮生」,係阿里巴巴旗下嘅無現金超市,佔地面積大之餘,仲可以即場捉海鮮,即叫師傅整,吸引到唔少年輕人去玩。
不過,深圳一方面發展得快,同時物價都係,好似一餐海底撈火鍋,人均閑閑地要百幾蚊人民幣埋單;一杯喜茶20幾蚊人民幣。所以而家北上消費,已經唔係「窮L」遊記了。而呢兩間網紅店,更加「反攻」香港,開分店,而且一樣受歡迎,印證內地嘅軟實力正不斷提升緊。
積臣相信呢個趨勢只會繼續,隨着大灣區嘅緊密發展,加上交通基建接駁,會有愈嚟愈多香港年輕人去大灣區玩。最終係內地人落嚟香港購買日用品,香港人北上吃喝玩樂。
【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。
撰文 : 積臣
欄名 : 積財有計