與Asha食雪糕降溫 Anson Lo火辣拍拖抹嘴調情

由盧瀚霆（Anson Lo）、徐㴓喬（Asha）、魏浚笙（Jeffrey）、黃德斌及簡慕華等主演的新劇《百萬同居計劃》，正拍攝得如火如荼，雖然Anson Lo近期忙於宣傳新歌，不過年輕人愈忙愈精神，昨日一早便於屯門開工，並且走了幾個地方，數十位「神徒」聞風而至，全程跟到實，場面非常墟冚，尤其當Anson Lo拍街景時，個個舉起手機拍攝，十足十睇演唱會一樣。有女學生坐車經過見到偶像，即叫家長停下車來，讓她可以落車離遠拍照，真的非常瘋狂。

Anson Lo與Asha全程拍攝甜蜜鏡頭，其中一場戲於雪糕車旁買雪糕食，大演「兩小無猜」，Anson Lo食到變「污糟貓」，Asha即細心地幫他抹嘴，之後Anson Lo禮尚往來，先用雪糕「揩」Asha面珠，然後再幫她抹乾淨，而遠處則有網紅麗英七情上面咬公仔洩憤。

戲內甜絲絲，戲外就有苦自己知，因昨日天氣非常悶熱，穿上外套的Anson Lo，一Cut機便要除外套兼吹風扇抖一抖氣，雖然辛苦，但見到Anson Lo狀態相當之好，神采飛揚，兼身形愈見大隻。