我是鏡粉會長(一)|Anson Lo神教主席辛苦過返工:老公反我眼!|香港01|即時娛樂

我是鏡粉會長(一)|Anson Lo神教主席辛苦過返工:老公反我眼!

撰文:鄺鈺瑩
出版:更新:

「呢個星期好感觸,甚至連感動都不足以去形容,因為一直以來做咁多嘢,都係想多啲人認識佢,而我係無諗過巨型billboard會咁曯目,6位數真係抵到爛。」身為巨型生日廣告的「幕後推手」,Annie的其中一個身份是MIRROR成員Anson Lo(盧瀚霆)後援會負責人。看著她為一系列生日應援、新歌宣傳而廢寢忘餐,甚至訪問期間仍在處理後援會事宜,都不禁要問一句「呢份工冇錢,咁辛苦為乜?」

身為後援會負責人,Annie(紅圈)也只能在公開活動或錄影節目時才見到「教主」一面,她說:「有時要企到最後舉名牌,可能連一眼都見唔到。」(資料圖片)

Annie的正職是朝9晚6寫字樓工,但接手後援會之後,她猶如一天24小時都在工作。「之前開放了加入fan club的機會,啲人交會費後我要遂條數去核對,有啲人會attach錯嘅入數紙、亦有人過完數被銀行reject,好多嘢要跟進,我整整一個星期都未核對完。」Anson Lo的生日有神徒為他鋪天式慶祝,而Annie的生日卻因為要準備「Stand By You」的展覽,而整日留在排舞室做搬運工人,直到深夜「收工」以一個杯麵了事。

Anson Lo首次推出單曲《一所懸命》,Annie與後援會幾位核心成員,不惜自掏荷包以做到廣告應援。(受訪者提供)

不過,這些對Annie來說,好像並不值得一提,因為做粉絲,永遠都是沒有最癲只有更癲。「試過有次Anson一日之內喺香港同澳門有活動,我哋去完銅鑼灣之後拎住燈牌趕船,點知去到澳門之後有雷暴警告,好記得個活動係戶外、草地。AK(江熚生)都係咁叫我哋走,但因為大家霸位霸得好辛苦,所以冇人願意走,最後我哋成班女仔係由面濕到底,坐船返香港時蹹到勁辛苦。但如果要講最癲……應該係Anson第一次solo,因為當時fans數量唔算好多,所以自己同埋其他helpers各自拎咗5位數出嚟。」

Annie當初睇《全民造星》純為解悶,從沒想過會被這男孩的舞蹈深深吸引,變為「神徒」以及後援會admin。(影片截圖)

Anson Lo在2020年首次推出個人單曲《一所懸命》,後援會為他租下Sogo大電視以及紅館旁的巨型廣告牌造勢。「因為係Anson 第一次solo,佢自己投放咗好多心機、心血,同埋都知道呢個機會真係好難得,所以大家都好緊張。同埋當時都仲幾多人用『姜濤隊友』形容佢,所以真係好想多啲人認識Anson Lo呢個男仔,就算自己揞錢都一定要做。」

本月初,後援會計劃集合「神徒」在巨型廣告牌前大合照賀壽,無奈當天有不少人在場派發小禮物,高峰時期聚集逾千人並出現人龍,最後因警員呼籲人群散去而未能大合照。(資料圖片)
Annie最後決定在文化中心外派發9百條生日手幅,雖然她已再三勸喻fans不要派發小禮物,以免又再引來警方到場,無奈的是佢有佢講,別人有別人繼續派……(資料圖片)

對於「追星」這回事,Annie說當初爸爸只笑她「幾廿歲人仲去追星」,而媽媽則認為「你結埋婚,我仲管你咩?」無錯,Annie其實是一名已婚人妻,近來幾次活動,都見到她老公穿上後援會的粉紅色制服,默默在旁為她打點一切。「老公初初係反眼,佢以為我出去玩,點知玩玩吓做埋呢個位。其實都真係少咗時間陪佢,二來我成日因為要處理fan club事宜而唔夠瞓,同埋佢唔明我點解要幫個唔識嘅人。」

為了Anson Lo的生日應援,Annie動用了自己的大假。生日當天,切過蛋糕後,繼續佈置「Stand By You」展覽。到底係愛定係責任?Annie笑言:「我成日都想出張單據同Anson收錢。」(資料圖片)

之所以會引發出Annie的追星癮,就要由三年前的《全民造星》講起,她說當初純粹抱著「睇騎呢」的心勢觀賞這個節目,直到開始分組比賽,她被一名跳舞好型的男生所吸引,然後就開始了這條不歸路。「當時已經有Anson嘅跳舞學生幫佢開咗IG Page,我慢慢接觸到對方後開始幫手。同埋當時入十強有得去美國同星級排舞師Travis Payne進行特訓,呢啲機會人生有幾可?就更想盡力去幫佢,因為Anson真係好努力去完成每一件事,所以後來見到佢被foul時喊真係好心痛,亦覺得好唔抵,當時ViuTV FB比人瘋狂洗版『還我Anson Lo』我自己都係一分子,哈哈!就係因為呢個戥佢好唔抵嘅心所以好想幫佢。決賽時佢雖然唔係十強,但因為係表現嘉賓,所以我哋都有拎晒燈牌去打氣。本身真係諗住have fun,如果唔係睇咗呢個節目,我可能係喺屋企過緊小確幸生活,得閒玩吓香薰、整吓蜜蠟花,哈哈!」

Anson Lo人氣急升,連帶後援會的 followers亦在一個月內曝增,Annie透露無論是要求加入「神教」抑或TG Group的私訊都是海量。

Annie透露近一個月加入後援會的人數以幾何級暴增,雖然工作量因而大增,但也認為值得。「當然有做到灰心,譬如有時好畀心機去做,但有啲人會覺得你別有用心,又或者係之前有人話我中飽私囊,不過有人嘅地方就有是非,唯有做好自己本分。」

點擊下圖睇埋後援會有幾能人所不能

+9
+4

同場加映:Anson Lo粉絲斥巨資為偶像慶生 尖沙咀現巨型廣告只係序幕

+2
發表評論...