【明報專訊】小米（1810）電動車SU7未定價，大家只好靠小米董事長兼行政總裁雷軍「唧牙膏式」暗示去估。噚日雷軍喺自己微博發文話：「小米SU7，同檔誰與爭鋒？」有網民評論，唔知同檔對手係邊個，催雷軍盡快公布小米汽車售價。雷軍回應：「50萬（人民幣，下同）以內，有對手嗎？」
啲網民見到雷軍話50萬元以內，各有不同反應，「分分鐘被model 3秒殺吧」、「算了，我還是等紅米電動車」、「小米SU7同檔無敵」等。上年12月28日小米舉辦小米汽車技術發布會，雷軍曾經喺會上稱售價9.9萬元係無可能，「凡有這種表現和配置的，都得40萬元以上！所以14.9萬元也不用再說了，還是要尊重一下科技啊！」之前佢曾多次暗示，呢次小米汽車「會有點貴，但貴得有道理」。 換言之，按佢道理，小米SU7售價可能喺40萬元至50萬元嘅水平。
同一日，小米公司發言人官方微博稱：「我們最近關注到一張關於小米汽車產業鏈的圖片，經核實，其中內容至少有50%完全錯誤。」但無講明邊啲啱邊啲錯，又或者係咪其餘四成幾唔錯得晒咁解？
email: financepage@mingpao.com