大家都知三哥最近進駐咗日本，一開幕已經大排長龍，而且更有多款日本限定嘅小食同食材。不過唔使葡萄人哋嘅，呢啲限定小食，香港都有啊。而且大受歡迎嘅鴨血仲回歸埋，兼且搵埋人氣歌手Tyson Yoshi（程浚彥）做代言，食米線，送postcard呢！

回歸嘅鴨血由台灣直送，連埋老油條一齊合成新品：三哥水煮湯老油條鴨血米線。水煮湯以15種香料同醬料提味，加入磨成泥茸嘅花椒、八角同鮮辣椒，湯底由5小辣起跳，後勁帶辛辣感。兩款配料都係索湯之物，嫩滑嘅鴨血索埋湯底之後更加入味，而老油條則係分碟上嘅，想要脆口感覺可以就咁直接食，當然浸一浸辣湯再食又有另一番滋味。
而家凡係惠顧每碗三哥水煮湯老油條鴨血米線，即送Tyson Yoshi postcard一張，fans記得儲起喇。

2款新小食有蒜香雞翼尖同蒜辣雞翼尖，兩者均以涼拌方式製作，前者有芝麻油香，後者則加入秘製紅油，專為辣椒仔女而設。因為成日都要做gym操肌嘅Tyson Yoshi試食後不禁感嘆：「我好耐未試過食呢啲咁有味嘅雞喇，平時啲雞都係冇乜味㗎，呢個係好食嘅蒜味！」

食完要解辣嘅，亦可一試同樣新推出嘅特飲——鴛鴦哈蜜瓜爆珠梳打。用咗兩款哈蜜瓜製作，面頭嘅橙色爆珠帶有赤肉哈蜜瓜甜味，底層嘅綠色當然就係哈蜜瓜汁啦，記得攬勻先飲啊。

而為咗慶祝譚仔三哥東京分店開幕，同步推出嘅仲有幾款日式小食同食材，包括油揚、京白菜同鵪鶉蛋。要特別推介香醋芝士鮮原茄，呢個真心幾好食。原個番茄切皮後，再混入秘製紅油香醋醬汁，灑埋芝士粉，食落酸甜有致又相當清新，亦係Tyson Yoshi最鍾意嘅一款小食。

TY短訪

最近出咗新歌《i don’t smoke & i don’t drink》嘅Tyson Yoshi接受訪問時表示，由於實在有太多人對佢有誤解，以為佢又煙又酒，「外表太壞 得到這反應 早已見怪不怪」。但直至有一次，TY同一個人講話「我唔飲酒」時，對方回應：「下？唔好玩啦，你唔飲酒？」TY話「佢嗰句講出嚟嘅語氣係非常之咁討人厭，我聽完之後就覺得我話唔係你都唔信嘅，咁就算喇我寫首歌，一次過處理晒呢啲人。」

 Tyson Yoshi《i don’t smoke & i don’t drink》MV (YouTube截圖)

而如果你有睇過新歌MV嘅話，可能都會留意到，今次MV開頭特別加咗個「Auto tune warning」嘅警告字眼。對此，TY解釋話：「一開始嗰個Auto Tune其實係玩嘢嘅，因為我自己嘅觀察啦，淨係香港地區，好似普遍反對auto tune嘅聲音係非常之多，我覺得有啲奇怪嘅，咁我就想point out 呢件事，因為成日見到啲comment話『好tune呀』，或者『太多tuning，不了』咁樣。」而前幾日就有啲外國嘅YouTuber見到呢個警告後，回應覺得唔使warn，Auto tune冇咩問題。TY表示外國人呢啲反應，正正就係佢想話返畀香港人聽嘅事。「Auto tune其實可以做到係幫助，又可以做到係一個effect去展示首歌嘅。」

至於日常寫歌嘅靈感來源，Tyson Yoshi話主要都係圍繞自己或者身邊人，係自己嘅情緒去驅使自己去寫一樣嘢。有時去跑個步，或者出去出面，甚至乎食嘢都會有靈感，咁唔知道今次三哥嘅新品，會唔會又令佢有新嘅靈感寫歌呢？

譚仔三哥米線
分店地址：（按此）