聽到囡囡叫媽媽 鍾嘉欣：開心到嗌咗出嚟
廣告
今日， 鍾嘉欣 出席ILLUMA奶粉品牌活動時，一如既往，一提到囡囡Kelly就非常高興。嘉欣話囡囡開始識得叫媽媽，自己當時聽到，開心到嗌咗出嚟。雖然做咗媽媽，但嘉欣話因為自己太鍾意娛樂圈工作，所以會一直接Job，仲話唔介意同埋囡囡一齊拍廣告。
透露囡囡先叫媽後叫爸
鍾嘉欣 同名模Ana R.喺中環出席ILLUMA奶粉品牌活動。每次講到囡囡Kelly就非常高興嘅嘉欣，今日都唔例外！嘉欣指九個月大嘅囡囡，每日都有好大變化，自己好鍾意幫佢扮靚，仲會一齊著母女裝。嘉欣仲開心透露囡囡已經識得叫爸媽：「我好記得4月17日係佢第一次叫媽媽，4月22日就叫Daddy。」
囡囡叫媽媽 開心到嗌出嚟
問到嘉欣聽到囡囡叫媽媽有咩感受，佢話開心到嗌咗出嚟，不過就有啲疑惑囡囡係咪真係叫自己。嘉欣解釋因為自己會叫囡囡食mum mum，所以唔知囡囡係叫緊自己定係想食mum mum。後來發現原來囡囡真係叫緊媽媽，因為當自己行開時，囡囡就會叫，仲話冇諗過囡囡會嗌媽媽先，不過老公都冇因為咁而呷醋，仲話最緊要囡囡健康。
唔介意同囡囡「母女檔」拍廣告
雖然嘉欣做咗媽媽，但佢就話自己好鍾意娛樂圈工作，所以會一直接Job。嘉欣仲話自己啱啱先為《溏心風暴3》錄咗首英文歌，不過已經兩年冇錄過歌，自己需要啲時間去適應返。講到唱歌，嘉欣就話自己已經作咗好多首兒歌，當佢朝早起身，見到囡囡笑或者流口水，就會好開心，覺得好幸福，所以就作咗首《媽咪朝早起身就望住我》。問到會唔會同囡囡一齊「母女檔」接Job，佢就話同老公商量過，如果係啲好品牌（廣告），都可以考慮下，當作留念都好。
遺憾未能見證姨甥女出世
提到嘉欣最近屋企再添新成員，佢就話自己做咗Auntie，BB係家姐嘅。仲話好遺憾之前家姐生第一胎時，自己見證唔到BB出世，以為今次家姐生第二胎都會錯過，點知自己趕得切搭飛機返去見證到BB出世，覺得好開心。後來又表示自己之前因為忙於工作，所以錯過了好多，日後唔想再錯過屋企嘅緊要事。
關鍵詞
鍾嘉欣
