世界盃仲有冇靚仔球星？想當年，頂尖球員往往不公平地超靚仔，意大利有巴治奧、德國有奇連士文、巴西有卡卡、英格蘭有碧咸，連亞洲區都有日本的中田英壽或者南韓的安貞桓，真係唔識睇波都要睇波。今日？數來數去還是C朗拿度，不是沒有其他靚仔，但又靚仔又好波的，好似真係冇乜。最靚仔被譽為模特兒一樣的門將卡列斯，剛剛就在歐聯決賽大出洋相，當然不會入到德國國家隊陣容。
登入 瀏覽本網站，可獲取積分換領專屬優惠
點擊查看專屬優惠
要在世界盃期間找到欣賞的對象，以下嚴選五大洲最靚仔代表。放心，入到國家隊，有份踢的。不會介紹拉蘭拿或費蘭度托利斯之類無份去俄羅斯的。至少，想印件波衫感受一下氣氛，都可以揀。
▲後生的碧咸完全無得輸！
南美洲靚仔明星：占士洛迪古斯James Rodríguez@哥倫比亞
不少人覺得巴西的尼馬好靚仔，靚仔到曾經在荷里活電影《3X反恐暴族》客串過一幕。Sorry囉，陣MK味濃過E-Kids成員，咁不如去麥花臣？計我話，南美洲代表一定係哥倫比亞的占士洛迪古斯。四年前的巴西世界盃，成為神射手，靚仔樣已經大受注目。
之後轉會皇家馬德里，受傷患困擾影響表現，竟然被外借到拜仁慕尼黑。你唔關心？OK！你至少要關心一件事：占士洛迪古斯去年跟結婚六載的妻子離異，現正單身。係無四年前咁陽光少年咁好笑容仲好似瘦咗一個碼，不過，多了份滄桑感咪即係更加有男人味囉。
歐洲靚仔明星：基奧特Olivier Giroud@法國
為爭取出席俄羅斯世界盃，法國前鋒基奧特選擇由阿仙奴轉會車路士，又真係求仁得仁，踢走阿仙奴舊隊友拿卡錫迪，成為法國最後廿三人之一。
雖然花名叫銀河唯一，有嘲諷的成份，笑佢經常門前失機，
中美洲靚仔明星：奧祖亞Guillermo Ochoa@墨西哥
美國三十二強不入，你以為中美洲便沒有靚仔之選？還有墨西哥嘛。你喜歡看《衝上雲霄》嗎？喜歡？嗱，Cool魔我就搵唔到，但Sam哥就有個似到十足的替代品。被稱為墨西哥Sam哥的門將奧祖亞，成個吳鎮宇餅印，親切感十足。
唔止得個樣，奧祖亞的把關能力實在掂，上一屆，試過阻止巴西狂攻，守和0:0，技驚四座。可惜墨西哥件門將波衫的設計，機師制服爭很遠。
亞洲靚仔明星：柴崎岳Gaku Shibasaki@日本
男人唔使話真係要好靚仔，識打扮肯打扮已經爭好遠。所以，你會明白，點解日本國家隊好似成隊都好有型咁，講到底，都係包裝。當年的中田英壽固然比明星更明星，之後的內田篤人也被推許為史上最靚仔球星。
可惜內田篤人踢完上屆世界盃已退出國家隊，有日本傳媒選來最靚仔十一人，也只有中場柴崎岳和後防槙野智章入選國家隊大軍名單。我就揀現效力西甲球會基達菲的柴崎岳啦。一來，在日本，可能受《足球小將》影響，外流球星始終較吃香，而槙野智章現正效力浦和紅鑽。何況，槙野智章個老婆係靚女明星高梨臨⋯⋯
非洲靚仔明星：沙拿Mohamed Salah@埃及
已經聽過不少女性大讚埃及的沙拿可愛。嘩，滿面鬍鬚，唔似係香港女性喜歡的類型喎？原來係因為見到佢在歐聯決賽被皇家馬德里的沙治奧拉莫斯弄傷，無法堅持而傷出，在球員上灑下男兒淚，我見猶憐，激發出不少女觀眾的潛在母性。
以為沙拿會因傷緣盡世界盃？偏偏一個好似好可憐的矮小球員，卻有驚人意志力，講明一定會及時康復。埃及是A組，西班牙是B組，兩隊真係有可能在次圈碰頭，到時，沙拿你唔好再咁好人被沙治奧拉莫斯叔叔欺負啦。
