ಸುಖಾಂತ್ಯವಾಯ್ತು ಏರ್ ಇಂಡಿಯಾ ವಿವಾದ: ಪ್ರತಿಭಟನೆ ವಾಪಸ್; ವಜಾಗೊಂಡ 25 ಉದ್ಯೋಗಿ ಮರುಸೇರ್ಪಡೆ!

ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ವಿವಾದಕ್ಕೆ ಕೊನೆಗೂ ಸುಖಾಂತ್ಯ ಸಿಕ್ಕಿರುವ ಲಕ್ಷಣ ಕಾಣಿಸಿಕೊಂಡಿದೆ. ಮೇ 6 ರಿಂದ ಹೆಚ್ಚಿನ ಸಂಖ್ಯೆಯ ಕ್ಯಾಬಿನ್ ಸಿಬ್ಬಂದಿ ಅನಾರೋಗ್ಯದ ನೆಪವೊಡ್ಡಿ ಕೆಲಸಕ್ಕೆ ಗೈರಾಗಿದ್ದರು ಎಂದು ವರದಿಯಾದ ನಂತರ ವಜಾಗೊಳಿಸಲಾದ 25 ಕ್ಯಾಬಿನ್ ಸಿಬ್ಬಂದಿಯನ್ನು ಮರುಸ್ಥಾಪಿಸಲು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಒಪ್ಪಿಕೊಂಡಿದೆ. ಮೇ 9 ರಂದು ನವದೆಹಲಿಯಲ್ಲಿ ನಡೆದ ಮುಖ್ಯ ಕಾರ್ಮಿಕ ಆಯುಕ್ತರ (ಸಿಎಲ್‌ಸಿ) ಮಧ್ಯಸ್ಥಿಕೆಯ ಸಭೆಯ ನಂತರ ವಿಮಾನ ಸಿಬ್ಬಂದಿ ಕರ್ತವ್ಯಕ್ಕೆ ಹಾಜರಾಗಲು ಒಪ್ಪಿಕೊಂಡಿದ್ದಾರೆ.

ಅಲ್ಲದೆ, ಏರ್‌ ಏಷ್ಯಾ ಇಂಡಿಯಾದೊಂದಿಗಿನ ವಿಲೀನ ಮತ್ತು ಭತ್ಯೆ ಸಮಸ್ಯೆಗಳನ್ನು ಪರಿಹರಿಸಲಾಗುವುದು ಎಂದು ಏರ್‌ಲೈನ್ ಆಡಳಿತದ ಪ್ರತಿನಿಧಿಗಳು ಭರವಸೆ ನೀಡಿದ್ದು, ಈ ಕುರಿತು ಮೇ 28ರಂದು ಸಿಎಲ್‌ಸಿ ಮತ್ತೊಂದು ಸಭೆ ನಡೆಸಲಿದೆ.

ಮೂರನೇ ದಿನ ಕ್ಯಾಬಿನ್ ಸಿಬ್ಬಂದಿ ಪ್ರತಿಭಟನೆಯ ರಜೆ ಹಾಕಿದ್ದು, ಈ ಹಿನ್ನೆಲೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ 85 ವಿಮಾನಗಳನ್ನು ರದ್ದುಗೊಳಿಸಿತ್ತು. ಹಲವು ವಿಮಾನಗಳನ್ನು ದಿಢೀರ್ ರದ್ದು ಮಾಡಿದ ಕಾರಣದಿಂದ ವಿಮಾನ ಪ್ರಯಾಣಿಕರಿಗೆ ತೀವ್ರ ತೊಂದರೆಯಾಗಿದ್ದು, ಈ ಕಾರಣದಿಂದ ಟಾಟಾ ಗ್ರೂಪ್ ಏರ್‌ಲೈನ್ ಸಂಸ್ಥೆ ಏರ್ ಇಂಡಿಯಾ ತನ್ನ 20 ಮಾರ್ಗಗಳಲ್ಲಿ ವಿಮಾನಗಳನ್ನು ನಿರ್ವಹಿಸುವ ಮೂಲಕ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಗೆ ನೆರವು ನೀಡಿದೆ ಎಂದೂ ತಿಳಿದುಬಂದಿದೆ.

ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌ನಲ್ಲಿ 200 ಕ್ಕೂ ಹೆಚ್ಚು ಕ್ಯಾಬಿನ್ ಸಿಬ್ಬಂದಿ ಮೇ 6 ರಿಂದ ಅನಾರೋಗ್ಯವೆಂದು ರಜೆ ಹಾಕಲು ಪ್ರಾರಂಭಿಸಿದ ಪರಿಣಾಮವಾಗಿ ವಿಮಾನಯಾನ ಅಡಚಣೆಗಳು ಉಂಟಾಗಿವೆ. ಈ ಹಿನ್ನೆಲೆ ಸಿಎಲ್‌ಸಿ ಸಮನ್ವಯ ಸಭೆ ಕರೆದಿತ್ತು.

ಈ ಮಧ್ಯೆ, ಸಿಎಲ್‌ಸಿ ಸಮನ್ವಯ ಸಭೆಗೂ ಮುನ್ನ ಪ್ರತಿಭಟನಾ ನಿರತ ಸಿಬ್ಬಂದಿ ಪೈಕಿ ಸುಮಾರು 25 ಮಂದಿಯನ್ನು ಕೆಲಸದಿಂದಲೇ ತೆಗೆದುಹಾಕಿತ್ತು. ಅಲ್ಲದೆ, ಈ ಬಗ್ಗೆ ಮೇ 8 ರಂದು ಕ್ಯಾಬಿನ್ ಸಿಬ್ಬಂದಿಗೆ ಪತ್ರ ಬರೆದಿದ್ದ ಏರ್ ಲೈನ್ಸ್ , “ಕೆಲಸಕ್ಕಾಗಿ ಅನಾರೋಗ್ಯವನ್ನು ವರದಿ ಮಾಡುವ ನಿಮ್ಮ ಕ್ರಮವು ವಿಮಾನವನ್ನು ನಿರ್ವಹಿಸದಿರುವ ಮತ್ತು ಸಂಸ್ಥೆಯ ಸೇವೆಗಳಿಗೆ ಅಡ್ಡಿಪಡಿಸುವ ಸಾಮಾನ್ಯ ತಿಳುವಳಿಕೆಯೊಂದಿಗೆ ಸಂಘಟಿತ ಕ್ರಮವಾಗಿದೆ. ಇದು ಅನ್ವಯವಾಗುವ ಕಾನೂನುಗಳ ಉಲ್ಲಂಘನೆ ಮಾತ್ರವಲ್ಲದೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಲಿಮಿಟೆಡ್ ಉದ್ಯೋಗಿಗಳ ಸೇವಾ ನಿಯಮಗಳನ್ನು ಉಲ್ಲಂಘಿಸುತ್ತದೆ’’ ಎಂದೂ ಹೇಳಿತ್ತು.

ಕ್ಯಾಬಿನ್ ಸಿಬ್ಬಂದಿ ಪ್ರತಿಭಟನೆಗೆ ಕಾರಣ?

ಈ ಹಿಂದಿನ ಏರ್‌ಏಷ್ಯಾ ಇಂಡಿಯಾದ ಉದ್ಯೋಗಿಗಳಿಗೆ ಪ್ರಾಶಸ್ತ್ಯ ನೀಡಲಾಗುತ್ತಿದೆ ಎಂದು ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಕ್ಯಾಬಿನ್ ಸಿಬ್ಬಂದಿ ಅತೃಪ್ತಿ ಹೊಂದಿದ್ದಾರೆ. ಕೆಲವು ಪೋಸ್ಟಿಂಗ್‌ಗಳ ಬಗ್ಗೆಯೂ ಅಸಮಾಧಾನ ವ್ಯಕ್ತಪಡಿಸಿದ್ದರು. ಅಷ್ಟೇ ಅಲ್ಲದೆ, ಏರ್‌ಏಷ್ಯಾ ಇಂಡಿಯಾದಿಂದ ಬಂದವರು 58 ವರ್ಷ ತುಂಬುವವರೆಗೆ ಉದ್ಯೋಗದಲ್ಲಿ ಉಳಿಯಬಹುದು ಎಂಬ ಒಪ್ಪಂದ ಮಾಡಿದ್ದಾರೆ, ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌ ಸಿಬ್ಬಂದಿಗೆ ಒಂದು ಅಥವಾ ಐದು ವರ್ಷಗಳ ಉದ್ಯೋಗವನ್ನು ನೀಡುವ ಅನ್ಯಾಯದ ಒಪ್ಪಂದದ ನಿಯಮಗಳ ಬಗ್ಗೆಯೂ ದೂರಿದ್ದರು.

ಅಲ್ಲದೆ, ಮನೆ ಬಾಡಿಗೆ ಭತ್ಯೆ, ತುಟ್ಟಿಭತ್ಯೆ ಸೇರಿದಂತೆ ಕೆಲವು ಭತ್ಯೆಗಳನ್ನು ತೆಗೆದುಹಾಕುವುದನ್ನು ಸಹ ನಿರಾಕರಿಸಿದರು. ಏರ್ ಇಂಡಿಯಾ ಮತ್ತು ಅದರ ಕಡಿಮೆ ದರದ ಅಂತಾರಾಷ್ಟ್ರೀಯ ವಿಮಾನಯಾನ ಸಂಸ್ಥೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಅನ್ನು 2022 ರಲ್ಲಿ ಖಾಸಗೀಕರಣಗೊಳಿಸಲಾಯಿತು ಮತ್ತು ಟಾಟಾ ಸನ್ಸ್‌ಗೆ ಹಸ್ತಾಂತರಿಸಲಾಯಿತು. ಸಂಘಟಿತ ಸಂಸ್ಥೆಯು ಈಗಾಗಲೇ ವಿಸ್ತಾರಾ ಮತ್ತು ಏರ್‌ಏಷ್ಯಾ ಇಂಡಿಯಾವನ್ನು ಹೊಂದಿದ್ದು, ಏರ್‌ ಇಂಡಿಯಾ ಮತ್ತು ವಿಸ್ತಾರಾ ಹಾಗೂ ಏರ್‌ ಇಂಡಿಯಾ ಎಕ್ಸ್‌ಪ್ರೆಸ್‌ ಅನ್ನು ಏರ್‌ಏಷಿಯಾ ಇಂಡಿಯಾದೊಂದಿಗೆ ವಿಲೀನಗೊಳಿಸುವ ಮೂಲಕ ಈಗ ಒಡೆತನದ 4 ಕಂಪನಿಗಳನ್ನು ಎರಡು ವಿಮಾನಯಾನ ಸಂಸ್ಥೆಗಳಾಗಿ ರೂಪಿಸಲು ನಿರ್ಧರಿಸಿದೆ.