A firma de luxo Louis Vuitton, do grupo LVMH, dedicará hoxe a presentación da súa colección para homes primavera/verán 2022 en Miami ao que foi o director creativo da súa liña masculina desde 2018, Virgil Abloh, falecido dun cancro o 28 de novembro.
O desfile está previsto para a xornada de hoxe nun antigo estadio para deportes náuticos de Miami, en coincidencia coa inauguración dunha nova tenda da marca na cidade.
Estadounidense de orixe ganesa, Abloh, de 41 anos, era tamén director creativo da marca Off White, da que o grupo LVMH é o accionista maioritario.
Nun comunicado Louis Vuitton anunciou que a presentación da colección masculina en Miami estará dedicada á “vida e o legado” de Abloh, ao que define como “un xenio creativo” e un dos “mellores comunicadores culturais dos nosos tempos”.
“Achandou o camiño para xeracións futuras. Como un devoto partidario da súa comunidade a través das súas organizacións benéficas e paixóns, era un eterno optimista que cría que todo era posible”, dixo Michael Burke, presidente e director executivo de Louis Vuitton.
O comunicado vai acompañado dun vídeo gravado en Miami no que simplemente se ve a un neno afroamericano paseando na súa bicicleta por distintos lugares da cidade. O vídeo termina cunha imaxe na que aparecen sobrepostas as palabras”: “Virgil estivo aquí”.
