O vilagarcián Jorge Martínez Vázquez ingresará hoxe como membro da Real Academia Galega de Ciencias, na sección de Ciencias Económicas e Sociais. Xunto a el tamén serán recoñecidos o matemático Francisco Marcellán e o físico Juan Ramón Sanmartín nun acto que terá lugar hoxe (19.00 horas) no Pazo de San Roque en Santiago de Compostela.
Catedrático de Economía da Universidade de Xeorxia (Atlanta), Martínez Vázquez foi recibido en Ravella polo alcalde, Alberto Varela, e a concelleira de Cultura, Sonia Outón, co obxectivo de trasladarlle a felicitación do goberno local, e todo o pobo de Vilagarcía, polo seu inminente ingreso na Real Academia de Ciencias de Galicia.
Varela recoñeceu con admiración a “prolífica e exitosa traxectoria profesional, intelectual e persoal” de Martínez Vázquez, asegurando que “é unha honra para Vilagarcía que uno dos nosos veciños, formado na educación pública, alcanzase todos estes logros, froito do traballo e esforzo, polo que debe ser un referente e un modelo para seguir pola nosa mocidade”.
Jorge Martínez Vázquez naceu en marzo de 1948 en Vilagarcía, onde iniciou a súa formación estudando no colexio León XIII. Tras cursar o Bacharelato e o PREU “por libre” deixou a capital arousá para iniciar a súa formación na Universidade de Barcelona e Complutense de Madrid, onde se licenciou en Ciencias Económicas, Xurídicas e Ciencias Políticas. Unha bolsa permítelle obter un doutoramento en Economía na Universidade de Washington e comeza a traballar como profesor na Universidade Estatal de Xeorxia en Atlanta, onde desempeña o seu labor durante catro décadas.
Doutor Honoris Causa pola Universidade de Vigo
Cunha vocación docente herdada do seu pai, Casimiro Martínez Altimir, que foi profesor e director do colexio José Antonio (hoxe A Lomba), a súa conexión con España e Galicia foi constante, tanto participando en cursos de verán como colaborando con universidades como Vigo, que en 2011 nomeoulle Doutor Honoris Causa.
Retirado da docencia, Jorge Martínez Vázquez dedícase actualmente a outra das facetas ás que dedicou parte da súa vida: a investigación académica sobre a economía do sector público. Unha das súas máximas é que “un bo sistema tributario é clave para ter bos sistemas de educación, saúde e infraestrutura e para o desenvolvemento económico e o benestar dos países”.
Foi consultor durante moitos anos de organismos como o goberno dos Estados Unidos, o Banco Mundial ou o Fondo Monetario Internacional.
