Maxus代理兩個月前先慶祝完MIFA 9賣出逾500部,話咁快又入多部七人車,就係啱啱日前(8月25日)喺成都車展上首展嘅MIFA 7。呢部內地稱為「大家7」嘅中型七人車,尺碼比MIFA 9細部少少:長4,907mm(短363mm)、闊1,885mm(窄115mm)、高1,768mm(矮72mm)、輪距2,975mm(短225mm),但勝在車高低過1.8米,入到大部份室內停車場,所以係好啱「大家」用嘅「7」人車。內地有三個版本(設備唔同)、兩款電池容量-77kWh(續航距離527公里)同90kWh(續航距離605公里)同一種性能輸出-244匹馬力及35.7kgm扭力。7同9嘅外觀唔算好似樣,反而同起亞部EV9仲似樣,而且7擁有一個比較低嘅風阻系數-Cd 0.268,同時內地係採用兩側電子倒後鏡,未知行貨係咪一樣。同樣未知係行貨會入六座定七座,兩款中排都係獨立大班椅,六座版嘅前座仲可以180度轉向中排,唔好問我哋行貨賣幾錢,因為我哋都唔知,淨係知道內地賣26萬人民幣至30萬人民幣不等。