精選6位祖雲達斯球星 或成全球最多靚仔球會！
撰文：東方新地｜圖片：Instagram
｜基斯坦奴朗拿度（Cristiano Ronaldo）
早前，剛踢完世界盃的基斯坦奴朗拿度（C朗）決定與效力9年的皇家馬德里結束賓主關係，並以1億歐元（約9億港元）轉會費轉投意甲勁旅祖雲達斯，簽約4年，年薪3000萬歐元，折合約2.8億港元。
雖然有網民坦言睇唔慣C朗著上祖雲達斯嘅直條波衫，但C朗嘅加盟，無疑令到呢隊意甲球會可能成為咗全球「最多靚仔球會」！
C朗好波就不在話下，有呢位頂級球星加盟，令祖雲達斯實力大增之外，亦同時令祖雲達斯多咗個好波又靚仔嘅球員。望住佢個招牌笑容，真係靚仔到暈！
另外5位祖雲達斯靚仔球星：
｜貝拿迪斯治（Federico Bernardeschi）
24歲嘅貝拿迪斯治擁有1米85嘅男神身高，上一季由費倫天拿轉會到祖雲達斯！
佢今季一共交出6個助攻，平均120分鐘就貢獻到一個助攻！
球技了得外，貝拿迪斯治外貌俊朗，加上一身肌肉同紋身，真係迷死一眾女球迷！
佢日常不時會喺IG上載生活照，見到佢又玩結他同攝影，真係無得彈！
｜戴巴拿（Paulo Dybala）
同樣24歲嘅翼鋒戴巴拿，今年世界盃就代表阿根廷上陣，可惜阿根廷於16強止步，戴巴拿上陣時間亦是極少，令想睇好波同睇靚仔嘅球迷都好失望！
戴巴拿算是近年阿根廷少有嘅靚仔球員，五官標緻配上充滿童真的笑容，都迷到唔少女球迷！早前日本雜誌《ViVi》舉行咗一個「世界遺產級美男球員」選舉，戴巴拿力壓C朗排第一呀！
每次戴巴拿慶祝入波都會做出招牌動作「Dybalamask」！
｜馬治斯奧（Claudio Marchisio）
今年32歲嘅馬治斯奧係位意大利國腳，身高有1米8，由7歲開始加入祖雲達斯青訓，係一個全能中場，無論短傳同遠射都同樣出色！
馬治斯奧擁有一雙迷人的藍眼睛，加上男神般嘅笑容，真係隨時都被佢電暈！
馬治斯奧個人亦甚有潮流觸覺，就算平時唔洗上陣，外出時亦會稍作打扮，有時亦會帶副超就行出街！
西裝造型加副黑超真係型到爆！
｜簡些路（João Cancelo）
簡些路上月啱啱由華倫西亞轉會到祖雲達斯，係位葡萄牙籍球員。
24歲嘅簡些路身高有1米82，一雙深邃嘅眼睛，加上健康膚色同鋼條身形，同樣非常吸睛！
簡些路曾經效力過賓菲加，喺球壇都算幾搶手，據知早前曼聯都有意斟佢轉會，不過佢最後都係去咗祖雲達斯。
簡些路Cool cool地唔笑，望落都幾Charm，靚仔就係咩表情望落都係咁靚！
｜安利簡（Emre Can）
24歲嘅安利簡係位德國中場，上月以自由身正式加盟祖雲達斯，簽約4年！
安利簡身高1米84，身形健碩，輪廓分明，加上鍾意留到成面鬚根，真係Man到爆！
安利簡每次出場都會「Gel行個頭」，實行以最佳狀態示人，之前佢嘅舊隊友韋拿杜姆接受訪問時，亦表示：「就算嗰日係最差嘅一日，安利簡恩嘅外表仍然保持得最好。」認真搞笑！
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
