193@ERROR自認失業中惹退團疑雲 IG再出文：你知我幾愛ERROR幾愛ViuTV

來自ViuTV《全民造星》的男團ERROR，成員之一的193(郭嘉駿)早前就在IG出千字文，文中似乎埋怨ERROR形象不夠好，機會不夠多，下款還說自己失業中。引來離隊退團傳聞。

          在 Instagram 查看這則帖子                  

［長文慎入］ 近呢兩集#Error自救TV 播出街後有唔少人問我會唔會繼續跳舞，甚至見到有人話我唔識跳舞拖累全隊。 趁今日放假就打篇長文同大家分享一下。 我簽約嘅時候係未有Error呢樣嘢，當時一心只想做一個電視台藝員，可以拍劇同做主持，亦都講過我唔會再跳舞。 之後開始有Error呢隊嘢，我當然接受，四個人相輔相成總比一個人走得快、走得遠。 其實我以前打波嘅時候受過好多次傷，韌帶撕裂過無數次，慣性甩骹係家常便飯。但我以前真係好熱愛運動，就算受咗傷都會繼續打籃球游水，所以keep住每個月都會甩胶。 因為熱愛，所以入過醫院同埋keep住要做物理治療。可惜因為長期甩骹，我開始有陰影，喺參加全民造星前一年已經無再做運動。 之後唔少人都應該有睇過我全民造星斷手，當時再次整傷舊患，而之前都未試過咁痛咁嚴重，所以入咗醫院，骨科醫生強烈建議我要做手術，喺無得揀之下於是自費用咗十幾萬去做微創手術。 照X-Ray嘅時候醫生話我因為慣性甩骹，所以膊頭嘅骨有一部份磨損到無咗，做手術都救唔到，以後好大機會風濕同埋就算做完手術都好易會再甩骹。 故事返到去Error成軍，當時大家都知我甩過骹而且唔識跳舞，所以每次排舞嘅時候都會盡量排啲簡單嘅舞步。雖然我好抗拒跳舞，而且跳舞嘅時候膊頭會刺痛，但我都會去做，當係幫人哋完成夢想掛。 其實都做咗三十年人，自己鍾意啲乜同唔鍾意啲乜絕對好清楚。唔鍾意就係唔鍾意，迫都無用。不過如果跳舞係對團隊事業有幫助嘅，我絕對會盡力去做，最多都係斷多次手啫。但我諗深一層，幫到有幾多呢？你識我哋、鍾意我哋，係咪因為我哋跳唱呢？學保錡話齋，成三十歲人又周身傷，唔好搞咁多嘢啦。其實開多個節目俾我哋做，或者做多幾首歌，會唔會令我哋事業更上一層樓、更多人認識呢？邊樣最有效，心水清嘅Error fans應該即刻答到。 講返我嘅興趣，我好鍾意fashion，畢業返香港之後曾經喺時裝界打滾過一段日子，亦都曾經幻想過自己可以成為一個fashion model，甚至係香港嘅fashion icon。但Error局限咗好多嘢，人哋總會覺得我哋騎呢、岩巉、樣衰、搞笑、甚至無腦。喂大佬我喺英國讀心理學㗎，而我自問轉數都幾快而且識講嘢，但無人會搵我去做正經節目，因為我係Error。喂我都算高大靚仔丫，岩巉樣衰關我乜事？ 我亦都好羨慕Mirror會有唔同嘅時裝品牌搵佢哋好型好chok咁拍廣告，收錢着住時裝品牌嘅衫出event。但我係Error，只得我着衫好睇、識fashion係唔夠，因為Error係四個人組合。 我從來無講過呢樣嘢，亦無喺鏡頭前怪責、嫌棄過其他人唔靚仔、身形差，因為我知道Error成軍嘅時候就係Error。呢個係既定嘅事實，所有嘢已經注定咗，而我哋四個唔係Mirror亦都有著唔同原因，大家無理由唔清楚。 而為咗團隊好，我一直go with the flow，然後自己瘋狂睇外國綜藝節目，去研究自己角色定位，研究點樣做會引到觀眾笑。因為我知道Error做綜藝係會有一番作為，會幫助到我哋四個人嘅事業。而做綜藝出色係唔夠，歌唱事業亦都可以令我哋成為一隊與別不同嘅組合，所以我keep住都有學唱歌，就算幫唔到團隊好多，最起碼都唔會成為團隊負累先。 好啦我有啲眼瞓，所以唔想繼續寫落去，總之今晚睇Error自救TV啦，得返3集咋。之後有排都見我唔到㗎啦，我手頭上嘅工作已經完成哂。（各位監製快啲搵我做節目/拍劇啦） 失業中的193上

郭嘉駿 Denis Kwok 193（@deniskwok193）分享的帖子 於 PDT 2020 年 6月 月 24 日 2:29 上午 發佈

不過他之後就在限時動態中再說：「我失業中純粹真係失業中，即係待業中，因為暫時未有任何節目/劇拍，Schedule上除咗上堂，其餘日子係空嘅。我絕對無退團呀，你知我幾愛ERROR幾愛VIUTV o架啦，你睇我啲字都係藍色嘅。」其實最近播出《ERROR自救TV》之外，其實今個月29日放放的《地產仔》也有他的參與。之後還有年尾的《男排女將》。而ERROR的經理人濟哥回應傳媒時亦說他不會離隊，只係近排咁啱193沒工作，所以放負。