要求退款出誤會 193＠ERROR疑爆粗鬧網店客人 「定係燒俾你？」

ViuTV男團ERROR人氣不亞於行偶像路線嘅MIRROR，成員193（郭嘉駿）嘅IG Followers人數更一度超越姜濤，而家有40萬fans追蹤。193之前寸咀回應曾志偉嘅言論，又恥笑大台搵40歲扮後生仔傾吓偈，被網民大讚夠薑，但係經理人花姐就認為193講意見都要理人感受。

不過直腸直肚嘅193最近疑似口舌招尤得罪網店客人，事件仲俾擺上討論區，唔少人都負評3爺！

事源係有網民喺討論區出Post指自己喺193開設嘅服裝品牌LILABOC買帽後一直收唔到貨，之後多次聯絡查詢要求退款都得唔到回覆，所以就決定出Post公開聲討，結果引嚟唔少網民熱議！

其後，193開設嘅服裝品牌LILABOC就喺社交平台貼出對話截圖，從中睇到店家問客人係咪「文盲」同「唔識中文」，更爆粗問對方點解9月開始訂購嘅新款tee，對方1月就過數但又要求退款。店家之後又就退款回覆對方「點知你依家用咩Account／定係燒俾你／快啦！」。

後來LILABOC又出限時動態講述事件「有個唔睇字嘅人，過咗三百蚊去我account，然後唔知幾耐之後再叫我退錢，已經好奇怪，唔知當呢度ATM度點。再者，間舖無營運咁耐，每日都99+ request，我又唔係急住賺嗰少少錢，所以冇乜撳入去睇，應該來來去去都係問頂帽有冇現貨、tee sizing之類。然後條友上網話我呃錢？自己X咗然後公審我？鍵盤戰士再話返我公審佢？咩世界？我不嬲對住啲我唔鍾意嘅人都係冇禮貌架啦，唔鐘意就唔好買囉，唔鍾意咪唔好關注我囉。啲鍵盤戰士打幾隻字我又唔會痛嘅，我都幾享受block人嘅快感，你為咗我開個新Account，然後我用一秒又block咗，幾爽。」

不過之後就有網民搵到另一張截圖，買家私訊LILABOC表示今年1月買咗頂帽，但係過咗好耐都冇貨收，於是要求退款。根據上文下理，似乎係店方誤會客人訂完tee要退款。

事件惹來網民強烈反應，有人認為疑似193態度惡劣，甚至有網友開post收集被193間網店走數嘅故事。暫時亦未知LILABOC同客人對話嘅訊息，係咪由193親自回覆。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！