【明報專訊】一講起龍皇集團（8493）當然會諗起酒樓，不過集團噚日公布，與河南三好智能機器人公司，以及河南三好法務科技公司訂立一年期戰略合作框架協議，3間公司將會合作進行機械人營銷計劃項目。
集團指定咗河南三好智能機器人作為二次開發廠商，授權河南三好智能機器人直接向供應商採購指定產品以進行定向開發；河南三好法務科技就會喺開發過程當中，成為合作內容提供者；龍皇將會採購不少於500部機械人。
集團就話行業人才短缺，相信內地同香港餐飲，以及其他服務行業對機械人有潛在需求，未來唔止喺旗下酒樓加入機械人，亦會發掘更多機械人商機。
其實，龍皇兩品牌喺香港得返3間酒樓，今次合作最少會買500部機械人，相信未來都會賣埋畀其他行家，唔知遲吓去酒樓飲茶，會唔會都係同一款機械人幫大家傳菜呢？
email: financepage@mingpao.com
