70
26
10
港鐵尖沙咀/尖東站 B1 出口, 步行約1分鐘
繼續閱讀
電話號碼
23665660
付款方式
其他資料
外賣服務
當面支付
以上資料只供參考, 請與餐廳確認詳情
食家推介
😱 早前 “洪爺” 江湖飯局不歡而散, 老友 “意大利長介” 決定喺 “頂好海鮮酒家” 擺番餐和頭酒.🥢 餐廳入口係彌敦道, 直接落地牢一層, 傳統中式酒樓格局, 裝修少少殘舊, 但光猛闊落, 大堂一眼睇唔唒, 至少二十張枱吧. 今晚安排廂房, 除咗用餐嘅圓枱, 另設一張六人長方枱, 用嚟放下袋呀雜物等等, 又設大電視唱卡啦Ok.🥰 “電視台美女” 多番推介 “頂好”, 今次麻煩佢搵老闆寫菜.滷水生腸太白醉鮑魚砵酒薑蔥瀨尿蝦炒球荔蓉帶子盒滋味小炒王鴻運乳豬, 半隻, 伴海蜇清湯蘿蔔蝴蝶腩菠蘿咕嚕第一刀蟹肉扒豆苗XO醬火鴨絲新竹米粉生煎包美點, 糖水🐚 滷水生腸. 老友 “長介” 點名嘅前菜. 生腸大大碌, 以形補形, 爽口, 略嫌唔夠滷水味. 🐚 太白醉鮑魚. 夠大隻喎, 有嚼口, 唔靭, 用刀叉切, 酒味適中, 過關啦.🦞 砵酒薑蔥瀨尿蝦炒球. 薑蔥非常惹味, 蝦身起肉, 加炸粉炒球, 好食! 可惜, 浪費咗瀨尿蝦滑捋捋嘅口感, 蝦頭蝦尾原汁原味同樣精彩, 哈.🤗 荔蓉帶子盒. 我唔鍾意食芋頭, 但鍾意食芋角. “荔蓉帶子盒” 異曲同工, 表皮酥脆, 以原隻帶子作餡料, 真係啱啱熟, 絕配口感軟糯嘅芋蓉, 一流.📖 翻查資料: 荔浦市, 係中國廣西壯族自治區桂林市轄下嘅縣級市, 農業發達, 荔浦芋頭 喺國內外享負盛名. 但係呢, 用荔浦芋頭做出嚟嘅 “蜂巢芋角” 又成為廣西柳州嘅特色小食.🦑 滋味小炒王. 魷魚蝦乾嘅鮮味, 由頭帶到尾, 出色!🐖 鴻運乳豬, 半隻, 伴海蜇. 多謝老闆送嘅海蜇, 但乳豬海蜇貌合神離, 賣相搞笑. 講番乳豬, 脆皮, 肉簿, 唔怕肥揗揗, 不俗.🐂 清湯蘿蔔蝴蝶腩. 明火瓦煲上菜, 熱辣辣, 牛腩入味, 軟膠部分 非常滑溜, 我鍾意. 蘿蔔清甜, 索唒汁, 掂!📖 翻查資料: “蝴蝶腩”, 又叫 “崩沙腩”, 或 “𧌇䖢腩” (“𧌇䖢” 喺南越語中意思係蝴蝶), 係牛嘅橫膈膜連著嘅腩肉, 軟腍味香. 🐖 菠蘿咕嚕第一刀. 咕嚕肉脆口, 肥瘦均勻, 味道平衡.📖 翻查資料: 第一刀, 指豬隻送到肉檔後, 第一個落刀嘅位置, 亦即係豬頸椎, 豬頭對下嘅小塊肉, 又名梅頭上肉或梅頭咀, 一隻豬只有一塊, 十分珍貴. 第一刀屬於半肥瘦豬肉, 纖維細緻, 沒有肉筋, 肉質腍滑.🥬 蟹肉扒豆苗. 豆苗鮮嫩, 誠意之作.🍜 XO醬火鴨絲新竹米粉. 鑊氣充足, 米粉乾淨俐落, 唔會黐𥹉𥹉. 菜單寫鴨絲, 我食唔到鴨絲, 哈哈. 🥟 生煎包. 驚你唔夠飽, 多謝唒. 皮略厚, 帶肉汁, 合格!🍪 美點, 糖水. 當大家飽到嘔, 以為食完嘅時候, 美點浪接浪, 曲奇餅, 雪葩, 大柑.🐟 蒸鹹魚. 食完晒飯, “長介” 口痕問廚房有乜好送酒, 結果嚟咗碟鹹魚, 真係比 “長介” 吹脹. 講番條鹹魚, 鹹鮮, 甘香, 可惜冇白飯.🤗 總結: 食物水準之上, 烹調技術穩定. 廂房裝修比大堂新淨, 服務非常到位, 加上老闆熱情招待, 用餐體驗愉快. “頂好” 逾五十年歷史, 裝修經過歲月摧殘, 用餐享受嘅唔只係食物, 而係味道.
繼續閱讀
難得大家同學仔一年聚會一次緊係要食餐好，今次唔例外都係來頂好，因為可以book房，可以坐幾個鐘大家慢慢傾偈，又講返細路仔時候嘅嘢😂係尖沙咀又方便大家咁就繼續揀呢間。今次已經寫好菜單，一嚟就有得食。先來一個頂好五小碟俾大家開開胃，然後天麻白术燉石頭魚湯，個湯好鮮甜好醒神，煲過湯嘅石頭魚肉及魚皮仍然好味好滑，超驚喜好啱飲；避風塘鮑魚，夠林又入味；薑蔥生蠔好多薑蔥，煎到脆卜卜唔錯；油泡大明蝦球，紅紅綠綠蝦又爽脆；蟹肉扒豆苗，好多蟹肉封住啲菜；薑蔥陳皮蒸虎彬斑，好滑好有魚味；脆皮燒雞真係燒到脆卜卜香噴噴。仲有飯麵甜品，超級滿足的一晚😀
繼續閱讀
估唔到天氣熱辣辣咁快就立秋，亦都估唔到咁快就有奄仔蟹食。同事食過好食，強烈推介，所以昨天星期日就同屋企人過去食。四個人食飯叫咗兩隻奄仔蟹，經理亦都有推介我們食奄仔蟹，佢話好多膏好多人客食過都話好正。咁我哋就叫咗兩隻試吓。用鹽燒。因為我哋覺得鹽燒味道香口濃郁，食落應該更加惹味。老實講都唔知真係靚唔靚，所以四個人叫兩隻試吓先。如果好食下次再嚟過。碟蟹一上枱，就望到滿滿蟹膏，金黃色，真係食指大動。馬上落手食，食蟹一定要落手食，一啖咬落去，啲蟹膏就好似雪糕咁，滑一滑，係黃金雪糕，好香口，連啲爪都食埋，唔好嘥。大家都覺得今餐應該食左正宗黃油奄仔蟹。侍應比盆熱茶我們洗手。服務都算唔錯。食到熱辣辣正宗黃油奄仔蟹大家都好開心。
繼續閱讀
中午嚟到頂好，叫了平時都會食嘅傳統點心 - 燒賣、腐皮卷、芋角、XO醬煎腸粉、粉果，水準一直都保持到，有種懷舊味道。今日見同事食燒味飯，我口淡淡反而想試吓鴨腿湯麵。燒鵝食過都不錯，我諗鴨脾應該唔會伏! 上檯時個湯麵原來好似炸醬麵咁-----湯同個麵係分上. 隻鴨脾放響幼麵上面(仲有條菜心)，有一 盅燉湯，湯顏色比較深色，估唔到入面有什麼材料。我個食法係: 飲一啖湯，然後食一啖麵，之後再食一大啖鴨腿肉。個湯好香帶甘味，鴨脾juicy 唔會UN，幼面彈牙有咬口無梘水味。整體感覺好正，覺得自己好似好識食咁😆呢樣一啖嗰樣一啖。食呢款麵，真係要慢慢一啖一啖食，滋滋陰陰咁，先至食到呢種經典感覺。
繼續閱讀
由於屋企有老人家，平時好少出街食飯，通常一家人都係屋企食，或者打邊爐，或者斬料，買啲燒肉或者叉燒返屋企一齊食，總之都係簡簡單單! 最近媽媽講咗幾次，叫我哋同佢出去食晚飯 。諗咗好耐，最後決定帶佢返去好多年冇去食過嘅頂好 （老人家的回憶）。一早寫定餸，盡量叫啲媽媽鍾意嘅餸菜，最緊要係林啲易食啲。最驚喜，其中有兩款菜，分別係清蒸東星斑同埋蒜蓉豆豉帶子蒸豆腐。條東星斑真係好滑好鮮、豉汁帶子豆腐好惹味。兩個餸都係好好送飯。睇落好簡單，但係唔知點解個蒸魚豉油同埋個豆腐汁都可以咁惹味。
繼續閱讀