政情：黎青龍傳獲港大聘任榮譽教授
桃李滿門嘅港大醫學院內科及肝臟科講座教授黎青龍，早前不獲港大續約，本地醫學界有聲音話可惜，港大醫學院師生更發起聯署要求校方重新考慮。近日就有傳黎青龍將獲港大醫學院聘任為榮譽教授，咁就可以繼續任教，其辦公室、秘書服務亦維持不變。
兼職教授合約原月底屆滿
年屆72歲嘅黎青龍，兩年前按港大教員嘅退休規定，轉為兼職教授。而今年3月就傳出，黎同港大嘅合約於5月底屆滿後將不獲續約嘅消息。當時有指黎之所以不獲續約，同佢過去多次力撐公立醫院醫護嘅訴求，以及批評政府處理疫情嘅手法有關，不過黎就認為，不獲續約可能係由於自己年邁，同政治無關，又指自己最大心願係繼續教書，即使免費義教亦可以考慮。
而黎嘅徒弟，醫學界立法會議員陳沛然，亦對師傅不獲續約感到可惜，又透露有人託佢邀請黎私人執業，惟黎拒絕。就喺約滿日子臨近之際，事情突然出現轉機，有消息指黎已接獲港大醫學院內科學系通知，下月起出任榮譽教授，聘用條件與兼職教授相若；而教務委員會亦有意向黎頒授榮休教授席，暫時未知結果。