【武漢肺炎.Emily Online】黎青龍探訪露宿者派口罩 (18:05) - 20200213 - 港聞 - 即時新聞 - 明報新聞網

即時港聞

【武漢肺炎.Emily Online】黎青龍探訪露宿者派口罩 (18:05)

新型冠狀病毒肺炎疫情持續,市民周圍撲口罩、消毒用品,但就唔係人人捱得起炒價或者通宵排隊。香港大學肝病權威、內科及肝臟科講座教授黎青龍,前晚(11日)就同聖雅各福群會露宿者綜合服務隊,一齊探訪銅鑼灣、跑馬地一帶嘅露宿者,免費派口罩畀佢哋。黎教授話覺得露宿者「好陰功」,有人即使有小量口罩,都唔捨得用;亦有人因為公共游泳池關閉,無法入去冲涼。佢認為政府應該向市民派發口罩同消毒用品,等大家都可以有足夠資源防疫。

Emily同黎教授傾過,佢前晚同一班社工、醫生去維多利亞公園同跑馬地行人隧道一帶,探訪約20名露宿者,每人獲派5個口罩。黎教授又教露宿者點樣戴口罩,同點樣保持個人衛生。佢話,露宿者生活好艱難,以往有人去公共游泳池冲涼,一星期一次,但而家好多公共設施關閉,佢哋無地方冲涼,「話要等設施開番先再冲,好陰功」。佢又話,有露宿者即使有錢,都會買其他嘢,例如頭痛藥、食物等。

黎教授話,露宿者瞓喺街道,街上好多人經過,可能會唔覺意接觸到病毒,居住環境屬高風險。佢提醒露宿者瞓覺都要戴口罩,同一個口罩最耐戴一兩日就要換,又呼籲佢哋要每日冲涼;但佢亦承認呢啲要求對露宿者而言較難做到。佢話,以往甚少關心露宿者,但覺得今次行動非常有意義同值得,佢下次會再同社工一齊探訪露宿者。佢亦希望政府向市民派發口罩同消毒用品,等普羅大眾都可以有資源防疫,又重申政府應「全面封關」,唔准曾到內地嘅旅客入境。

武漢肺炎 相關報道:

本港增一確診 患者從事保險 3客戶或要檢疫

衛生署社署2月17日起服務調整一覽

天主教香港教區2月15日至28日暫停公開彌撒

相關字詞﹕黎青龍 露宿者 武漢肺炎 新型冠狀病毒肺炎COVID-19 武漢肺炎確診個案 武漢肺炎香港 武漢肺炎疫情 新型冠狀病毒 新型冠狀病毒感染 武漢封城 新型冠狀病毒肺炎 武漢 編輯推介

上 / 下一篇新聞