政情：家庭理由 民政局政助黎穎瑜跳船
再有政治助理跳船！有消息指，民政事務局局長政治助理黎穎瑜因家庭理由突然請辭，指要照顧家人需要。並且已經跟足程序，喺一個月前遞信，消息指局方好快就會有正式公布。
黎穎瑜於2013年11月出任勞工及福利局局長政治助理，於2017年政府換屆時轉任民政事務局政治助理。黎於加入政府前，曾任齊心基金會副行政總裁及智經研究中心政策倡議總監。
於去年完成公務員宣誓
民政事務局局長徐英偉於舊年4月上任，接替前局長劉江華，當時黎穎瑜表示同徐英偉認識多年，一直合作無間，將會留任，繼續協助及配合徐嘅工作。
政府新規定公務員須簽署聲明確認擁護《基本法》及效忠香港特區，並於舊年12月16日喺政府總部舉行副局長同政治助理宣誓儀式，全體12位副局長同14位政治助理喺特首見證下完成宣誓，其中包括黎穎瑜在內。
黎穎瑜亦非首名離任嘅政治助理。政府問責團隊喺舊年4月份大換班嘅時候，財經事務及庫務局時任政治助理楊寶蓮喺財庫局局長許正宇上任5日後就宣布離任，楊當時話係適當嘅時候離開，並祝願許一切順利。