誓破11期不勝悶局 黎昭昇今期曬冷

黎昭昇今季暫時取得24場頭馬，成績都算平穩，不過原來呢位新西蘭籍練馬師，至3月20日憑「魔法速遞」取得連捷後，已經食咗超過1個月白果，自3月24日至今，黎廐曾取4亞7季成績，反映練者唔係唔搏！話咁快今期賽事來到5月，相信黎廐都好想盡快破悶局，因為佢喺9場賽事派遣8駒上陣，出馬數量多之餘，唔少都有近績支持。

其中第3場五班1650米，「世界籐王」今季已跑10仗，最近6仗跑入獎金名次表現準繩。此駒戰至1月終在潘頓胯下打開勝門，不過此駒經常有慢閘問題以致姍姍來遲，跑畢上仗後練者今仗著意安排此駒增程至一哩兼打王牌出擊，鬥志毋庸置疑。

至於第9場三班1200米，「穿甲鷹」跑完幾場沙田之後，上仗終於回師谷草主場，結果喺湯普新胯下沿途留後，最後只衝回一席殿軍，今場已經話咁快變咗潘頓接手，回看此駒過往3W評分均在65至70分取得，現時評分有利，抽埋個3檔守番中間再衝，有權重返勝門。