黃寶欣與鄭敬基「茶記」合體

今年五十歲嘅黃寶欣，結束廿年婚姻回復單身後，進軍飲食界，年頭喺九龍城開咗間餅店，主力賣酥皮蛋撻，好食到經常出現人龍。最近，佢再下一城，喺隔籬開咗間茶餐廳。

日前，東姑就撞到老闆娘坐鎮喺新開張嘅茶餐廳，見佢坐埋卡位，招呼住一位前輩級男士，同埋老拍檔鄭敬基，三個人圍埋一枱好好傾，懷緬下過去又展望下將來，傾到雞啄唔斷。而黃寶欣仲不停「賣花讚花香」，強硬推介佢舖頭馳名嘅奶茶同蛋撻。而側邊枱，仲見到佢位公子，約埋朋友仔嚟食下午茶，幫襯番自己媽咪，好乖仔。

記得當年八十年代，黃寶欣同鄭敬基合唱嘅〈酒杯敲鋼琴〉熱爆K場，事隔三十年後，早排佢哋再亮相無綫節目《流行經典50年》，反應非常熱烈，網民仲大讚黃寶欣寶刀未老，大可復出樂壇添。不過，佢依家做老闆「食大茶飯」，睇嚟都志不在唱歌；反而去佢間「茶記」，仲易見到佢兩個再度「合體」。老友聚舊又可以順便做埋舖頭「生招牌」，黃寶欣認真識做生意。

早排，黃寶欣同鄭敬基合體上無綫節目《 流行經典50年》，合唱佢哋首本名曲〈酒杯敲鋼琴〉，網民大讚黃寶欣聲靚，支持佢復出樂壇。

黃寶欣年頭喺九龍城開咗間餅店，主力賣酥皮蛋撻，好食到街知巷聞，佢最近再喺隔籬開咗間茶餐廳。

黃寶欣同鄭敬基呢對《酒杯敲鋼琴》嘅老拍檔，喺女方新開嘅「茶記」再「合體」聚舊。