童你一起長大了︳吳晶晶成兩子之母 Polly姐姐脫離紀律部隊拯救流浪貓狗

TVB節目《童你一起長大了》最新一集搵到90年代初嘅《閃電傳真機》主持人吳晶晶同黃寶君（Polly）再現螢幕！2位姐姐離開兒童節目之後就退出幕前，各自發展人生路向，但仍然十分老友。

晶晶姐姐同Polly姐姐90年代初經常為《青春》雜誌擔任時裝模特兒，自此成為朋友，並且一同加入TVB成為青少年大使，更被委派一同主持《青春前線》及多個兒歌節目主持。

1996年TVB暫停兒歌節目後，吳晶晶轉行成為空中小姐，後來結婚組織家庭，而家2個仔都好大個，有Daddy咁高！晶晶姐姐喺《童你一起長大了》入面提到，人生規劃比較傳統，就係想小朋友快樂。

而Polly姐姐就投考紀律部隊，不過係邊個部門就眾說紛紜，有網友話係警隊，仲話有朋友同佢同期喺學堂畢業；亦有資料指出Polly曾經加入懲教署。現在嘅Polly喺屯門開寵物店，自己做埋美容師為毛孩扮靚，更會親身拯救流浪貓狗。

當年晶晶姐姐同Polly姐姐合作無間，即使離開幕前多年，喺節目入面仍然默契十足，晶晶姐姐仲話慶幸有十年時間同Polly一齊成長，即使無見一排都可以坦誠相對，兩個人仲講到眼濕濕，好感動！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！