麥貝夷跳樓邊緣自救
歌手麥貝夷（Karene）去年與大名娛樂解約，一度零收入的她自爆曾患上抑鬱，更萌生自殺念頭。如今雨過天青，Karene簽約新公司重新出發，更將經歷拍成微電影，勉勵別人之餘同時自勉！
麥貝夷
Karene把自己的經歷拍成微電影，勉勵別人。
拍攝當日不停下雨，令這幕高空拍攝有一定難度。
麥貝夷去年與拍檔鍾一憲齊齊被大名娛樂提早解約，兩人各散東西後命運各異，鍾一憲獲韓國公司賞識做練習生，雖然最後未能進軍韓國，但仍能到內地拍劇搵人仔；而Karene則慘變「孤兒仔」冇人接收，其後患上抑鬱，甚至想過自殺：「喺2013年年底，我諗住走上天台自殺，點知度門鎖咗。加上當時同朋友一齊住，我唔想自殺之後，佢間屋變咗凶宅。」
星級教友開導
之後Karene獲一眾星級教友，包括鍾舒漫、張致恒和關心妍等開解，慢慢走出陰霾，更簽約新公司接拍多部微電影及舞台劇 ，其中一套更將她的經歷搬上螢幕：「呢個係講鍾意唱歌嘅女仔成為歌手嘅故事，導演之前問我點解咁想成為歌手。我話因為媽媽對我要求好高，有一次我求奇唱幾句，佢讚我唱得幾好，我記在心，後來真係做到歌手，我媽媽反而問我點解要做歌手，我講番因為佢讚我，微電影都有擺呢個情節落去。」
微電影拍攝期間曾發生一段小插曲，Karene說：「有一幕我哋用高空拍攝，已經朝早6點幾去銅鑼灣拍。但當時風向唔定，又不停落雨，啱啱拍完就有啲着制服嘅人員嚟，可能拍嗰時有人圍觀，佢哋以為有人喺鬧市玩遙控飛機，不過佢哋嚟到已經拍完，算係有驚無險。」
