指數基金比主動基金更受歡迎？ 巴菲特用「10年賭局」證明

根據投資研究機構晨星（Morningstar）的研究，截至今年8月底，美國指數基金資產規模已經達4.27萬億美元，首次高過主動基金嘅4.25萬億美元，顯示出指數基金比主動基金更受投資者歡迎。

指數基金大受歡迎，係因為投資者唔需要每日追漲殺跌、唔使主動揀股，而投資回報又可以大致與大市同步，加上管理費用低，種種原因令指數基金成為受歡迎的投資產品。𠵱家買指數基金其實唔難，係交易所都輕易買到追蹤指數嘅ETF，例如大家熟悉嘅盈富基金 （02800） 。

巴菲特「10年賭局」

指數基金好唔好，其實有好多機構研究都有報告，例如S&P Global SPIVA每年都會披露各國家嘅主動基金VS指數基金嘅比較。不過，最威都係「股神」巴菲特（Warren Buffett）。2017年，巴菲特勝出一場「10年賭局」，用行動去證明指數基金表現更勝對冲基金。

2005年，巴菲特向對冲基金從業員發出賭局邀約，話投資低收費嘅指數基金，10年後嘅表現會比對冲基金好，如果有人能贏佢，就可以得到100萬美元獎金。嘩！咁公然地打爛人哋飯碗，唔係巴菲特呢啲上咗「神壇」級數嘅人物邊度得。

2007年，Protege Partners共同創辦人Ted Seides就接受咗「股神」呢個公開賭局。先記住同年更加發生影響全球嘅金融海嘯。巴菲特當時就買入Vanguard標普500指數基金，Seides就買入了5隻對冲基金應戰。10年後，結果出爐，巴菲特自豪地宣布佢贏咗。

▲ Protege Partners共同創辦人Ted Seides

2018年巴菲特係「巴菲特致股東信」中「認叻」，證明自己贏咗場賭局。巴菲特投資嘅Vanguard標普500指數基金嘅年平均年回報為8.5%，而Seides只有2.96%，咁睇，指數基金又的確係比主動基金更優勝。

▲ 巴菲特投資標普500指數基金打贏5隻主動基金

前面咪提到2007年發生影響環球嘅金融海嘯，美國股票市場當然風聲鶴唳，2008年巴菲特投資回報都唔好㗎，蝕咗37%，但之後標普500指數展開長期牛市升浪，某幾年指數雖然浮浮沉沉，回報唔算標青，但拉勻長遠來講，巴菲特回報都係可觀，亦證明投資指數基金更適宜長坐。

8成多基金跑輸指數

根據CNBC報道，儘管有基金經理喺1至2年回報係跑贏指數，但呢種情況並不會持續落去，比較10年表現，有85%主動基金係跑輸標普500指數。

因此，巴菲特一直建議投資者應買入低收費的指數基金，「持續買進低成本的標普500指數基金，我想，在多數情況下是最理想的選擇。」

講返Seides，佢事後否認因為收費關係令佢輸，佢認為2008年標普500指數經歷大跌後，其後兩年出現暴力式反彈先係主因，另外美國量化寬鬆政策影響下，亦令指數喺呢10年不尋常飆升。

大家點睇呢？積臣認為講多無謂，結果最實際，其實好多人都唔得閒睇市、揀股，何不揀最簡單嘅投資方法呢？

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。