拍完《同盟》就收山？ 鮑起靜：年紀都大，唔可以拍太多
撰文：溫菁莉
出版：更新：
《同盟》一班演員包括陳展鵬、鮑起靜及陳山聰等，今午出席宣傳活動。（溫菁莉攝）
去年由文偉鴻監製的無綫劇集《城寨英雄》叫好叫坐，相隔一年，他以《同盟》再度出擊，劇中一班演員包括陳展鵬、鮑起靜及陳山聰等演員下午出席宣傳活動。相信觀眾一見到陳展鵬同鮑姐不期然會諗起「亞視」，鮑姐就笑言，「完全唔會有亞視feel！」
鮑姐好大力就輕易劈斷木板，勁！（溫菁莉攝）
陳山聰同張秀文玩到瞓哂地，好激烈！（溫菁莉攝）
鮑姐透露在亞視嘅時候，曾與陳展鵬合作飾演母子，今次在TVB首部劇集又係做母子，「前後啱啱10年，又再重逢。佢真係成熟咗好多，叻咗好多。」提到今次劇集都以動作戲為主，今年已經68歲的鮑姐都避免唔到，相當吃力，「要走嚟走去，又踎底起身，都幾大運動量。而且我以前好驚要揸槍，因為好重。但今次拍之前真係有上堂學，所以算係克服咗。」但佢就話好彩拍攝劇集期間係秋天，未至於太過辛苦，「上年9月尾開始拍，天氣都涼涼地，感覺都幾好。」
在TVB拍劇出名辛苦，鮑姐就話無論邊度拍劇都會辛苦，「今次雖然係捱更抵夜地拍，但每位演員拍完之後就好似吸毒咁，上哂癮。唔記得咩係辛苦，留低都係最好嘅回憶，拍出嚟效果好好。」她表示今次拍劇好多時候都要拍到朝早，「係拍到直接食早餐，拍到講對白到完全唔知自己講緊咩，但呢啲都係好好嘅回憶。」
至於早前有報導指她拍完《同盟》後就不再拍無綫劇，鮑姐就一笑置之，「唔好咁講，始終拍劇又唔可以拍太多，年紀都開始大，但有好嘅劇集拍下都可以嘅。」咁睇嚟觀眾睇完《同盟》之後，都仲有機會睇到鮑姐的戲，佢之後又補充話，「拍咩劇都唔緊要，最重要有Jazz呢個咁好嘅監製，咁好嘅劇本，拍幾多都願意。」
《同盟》活動大會送上「生煎包」俾鮑姐，原來背後意思係，陳山聰、陳展鵬，鮑起靜嘅統稱。（溫菁莉攝）