魷魚 (遊戲)

出自維基百科,自由嘅百科全書
跳去導覽 跳去搵嘢
魷魚遊戲場地

魷魚韓文오징어),係韓國嘅一種細路遊戲。遊戲主要流行喺1970至1980初韓國兒童之間,遊戲場地主要喺兒童遊樂場、學校操場或鄰近嘅巷仔[1]

隨住土地被石矢覆蓋同發展,遊戲空間消失,導致遊戲逐漸式微,魷魚遊戲喺1980年代之後已經唔再喺細路之間流行。

遊戲名[編輯]

遊戲之所以有噉嘅名,係因為遊戲場地上面嘅圖案由圓形三角形正方形組成,形狀好似魷魚噉。呢個遊戲名存在地區差異,例如又稱為「魷魚蓋桑」(오징어 가이상)。有部分人堅持認為「蓋桑」係日語「開戰」(日文開戦かいせん kaisen)嘅變體,係朝鮮日治時期遺留下嚟詞彙,但係呢個詞冇喺時代轉變時被清洗,而家已經喺某種程度上融入韓國民俗[2]

玩法[編輯]

呢個係一個多人遊戲,可以由3至10個人玩,最多可以容納20個人,玩家用猜包剪揼分為攻守兩隊。遊戲主要有兩個獲勝方式,一個係攻擊者抵達目的地,另一個係殲滅對方所有成員。攻守兩隊嘅主場稱為「屋」。最上面嘅圓圈係進攻隊嘅屋,而底部嘅長方形係防守隊嘅屋。呢個遊戲通常係進攻方佔優勢,而對防守方不利。

遊戲區域[編輯]

  • 1區係攻方嘅起點
  • 3區係守方嘅起點
  • 2區係當任何一個攻方玩家成功抵達之後,攻方就獲得勝利
  • 3區底部係門嘅位置,攻方需要從外面通過呢度門先至可以進入3區裏面,唔可以喺出面跳入去,犯規嘅會被淘汰。而守方亦必須通過呢度門先至可以出到外面,如果喺3區跳出外面都係犯規,會被淘汰。
  • 4區係一條河,當攻方過咗河之後,就可以雙腳行走

走動限制[編輯]

攻方喺1區、4區外嘅圓形區、3區門外可以雙腳走動,喺其他地區必須單腳跳。4區係一條河,一旦攻方以單腳跳過河,就可以改為雙腳行走。

守方喺1區、3區、3區嘅門、4區外嘅圓形區可以雙腳走動,但如果喺門出去之後,就必須單腳跳形式同攻方對抗。

淘汰方法[編輯]

  • 要喺單腳跳嘅時候,另一隻腳掂到地
  • 雙腳行走嘅時候手掂到地,例如自己跌倒或俾對方整跌
  • 以線為界,俾對方拉入或拉出自己嗰方所屬於嘅區域,會被淘汰
  • 踩線,當雙方玩家嘗試將對方拉入自己區域嘅時候,踩到界線嗰一方會被淘汰

獲勝方式[編輯]

攻方獲勝有兩種方式,第一種係將守方玩家全部淘汰,第二種係有其中一個攻方玩家成功抵達2區。

守方獲勝嘅方式係唔好俾任何一個攻方玩家成功抵達2區,並且將全部攻方玩家淘汰。

流行文化[編輯]

2021年Netflix電視連續劇《魷魚遊戲》嘅標題係用劇裏面嘅魷魚遊戲,第一集開頭提個呢個遊戲,最後一集以呢個遊戲嚟定出最後贏家。喺電視劇《魷魚遊戲》風靡全球嘅浪潮之下,魷魚遊戲重新開始流行起嚟[3][4]

參考[編輯]

  1. 오징어 게임’이 뭐길래…. 韩国时报 (韓文). 2021-09-29.
  2. 오징어놀이. 韓國民間藝術詞典 (韓文). 2021-10-04.
  3. "Everything to know about 'Squid Game', the surprise Netflix hit series". Fortune (英文). 2021-10-03. 喺2021-10-06搵到.
  4. 부활하는 오징어 놀이. 朝鮮日報 (韓文). 2021-09-29.