七月節,好多人都會問係咪特別易見到嘢,老實講,對於我自己,其實係差唔多嘅。如果你平時根本唔易見到,唔會話無情情一到七月就見面。反而係好多時因為外來環境嘅關係,例如夜晚條街明顯少左人,天氣岩岩入秋,多左人燒街衣,有盂蘭盛會,鬼片出籠…等等。搞到自己忐忐忑忑,疑心生暗鬼,覺得周身唔聚財,周圍陰風陣陣,好多時都真係心理影響。
「佢地」係會圍埋附近等收嘢嘅。之前都提過,曾經見過街邊有人响到燒街衣,當佢一件一件將d元寶溪錢放落化寶盆嘅時候,火光幢幢間, 係佢背後陸陸續續出現一個又一個嘅白影,飄飄盪盪,頭垂到好低,哄住個火爐,等收嘢。
所以,各位巴打絲打見人燒街衣,唔好多事手指指喇,有人又會鍾意講下人地地下份燒肉,又眼啤啤咁,幾不敬。最好呢,耷低頭,快步行過就好。
仲有,習俗上燒完街衣會掉低d硬幣或者紅包係地下,相傳話係俾d牛頭馬面嘅,唔好執…係常識吧。我知我知,雖然呢排股市大跌,樓價又持續高企,大家都窮,不過個d硬幣都唔夠你用黎複合投資架啦,還是算了罷,記住唔好貪心為妙。
哈,你話呢?係燒完街衣過後嘅化寶盤附近有好多張一千蚊紙係地下飄下飄下,仲要咁岩得你見到…執唔執?你認為呢?
而無燒開街衣習慣嘅就唔好無啦啦見人燒你就燒,呢個之前都講過架喇。
真嘅。事關你夜媽媽戴住果d鈴鈴冧冧嘅手鏈,一路行返屋企嘅時候,你每行一步,都會不其然因為d撞擊聲而發出好清脆好有節奏嘅「鈴鈴…鈴鈴…鈴…」咁樣嘅聲。
而好多路邊嘅遊魂「朋友」聽到呢種聲,會以為係對佢地嘅呼喚,因而跟住你發出嘅,
而家成日見d潮流妹子成手都係果d pandora 粒粒膠,上面又掛住字母牌又吊咀又海豚又閃石又鎖匙,一揪二冧咁,每行一步就「鈴鈴...鈴鈴」一下,每行一步又「的的...的的」一下。
Tag 鍾意成手一揪二冧累累贅贅,一路行一路鈴鈴聲,愛戴pandora粒粒膠嘅frd 入。七月節,叫佢地戴少個月啦。鈐鈴...鈴鈴...