雅虎香港新聞 【學車攻略】2021年最新六大駕駛院校費用 自動波私家車/貨Van課程全包$6,158起
唔少人都會趁年頭set好新一年嘅目標，當中學車可以話係每年最熱門嘅目標之一，學成之後有成功感之餘又可以獲得實際技能，仲有機會幫助搵工或者開始副業。今次著數專員整理左香港六大駕駛學校嘅初學車者駕駛課程價錢，公認最易操作嘅自動波私家車課程HK$7,000有找就有交易，考完可以揸曬輕型貨車 (貨Van) 同私家車嘅課程亦只需要HK$8,150起，未申請過持續進修基金的話，兩者成本更加低至HK$5,122！
學車易 私家車HK$6,158起 / 14堂；貨Van HK$8,408起 / 20堂
優點：
私家車初學套餐六間裡面最平，包括14堂45分鐘嘅路面駕駛訓練，同埋考試車鐘、租車費
上足14 / 20堂後可按學習進度選擇加堂，每堂HK$260 / HK$280 (私家車 / 貨Van)
缺點：
優惠價錢屬於「九龍區早鳥優惠」，只適用於考試日期前不少於4個月報名，而又希望報考九龍區路線嘅人士
不設私家場地練習泊車、掉頭等
不設指定考試場地
車款：無指定
鏗鏘駕駛學校 私家車 HK$6,908起 / 15堂；貨Van HK$280起 / 堂 + 租車費
優點：
港九新界都可以上堂，安排較靈活
九龍、新界上堂嘅私家車套餐為第二最平 (僅次於學車易)，包括15堂45分鐘嘅路面駕駛訓練，同埋考試車鐘、租車費
私家車課程上足15堂後可按學習進度選擇加堂，每堂HK$270
另設有25堂收費HK$9,608起嘅套餐選擇，適合唔係太有信心嘅學車人士
缺點：
以上優惠價錢只適用於九龍及新界區，港島區分別會貴HK$150 – HK$250不等 (每個套餐計算)
自動波貨Van暫時未設有套餐價，只能夠以HK$280每堂計算，再另加考試租車費 HK$1,900起
暫時未設有網上報名服務，報名就要帶埋所需文件親身去返分校辦理，較為不便
不設私家場地練習泊車、掉頭等
不設指定考試場地
車款：全新TOYOTA Prius-C私家車 / TOYOTA HIACE輕型貨車
報名方式：需向各分校查詢
A1 駕駛學校 私家車HK$6,958起 / 15堂；貨Van HK$8,150起 / 15堂
優點：
港九新界都可以上堂，安排較靈活
私家車課程為第三最平，包括15堂45分鐘嘅路面駕駛訓練，同埋考試車鐘、租車費
貨Van同樣係15堂45分鐘亦只需要HK$8,150起，為六間裡面第二最平 (僅次於李健)，且為「星級師傅」課程
私家車學員亦可以選擇「星級師傅」套餐，由前「香港駕駛學院」資深師傅教授，更有信心保證
缺點：
以上優惠價錢只適用於九龍及新界區，港島區分別會貴HK$150 (每個套餐計算)
不設私家場地練習泊車、掉頭等
不設指定考試場地
車款：MAZDA 2私家車 / TOYOTA HIACE輕型貨車
李健駕駛學校 私家車HK$7,286起 / 34堂；貨Van HK$7,626起 / 34堂
優點：
港九新界都可以上堂，安排較靈活
課程除左包括基本15堂路試訓練，亦都包括左各類型模擬測驗、機械常識甚至心理備戰等等唔同攻略，加埋總共係34堂起，可以話係全方位應試準備
輕型貨車課程入門價為全部院校入面最平，包括34堂課程，同埋考試車鐘、租車費
另設有53堂收費HK$10,686起 (私家車) 或者 HK$10,986起 (輕型貨車)嘅全包套餐選擇，適合唔係太有信心嘅學車人士
缺點：
套餐內容豐富但欠缺彈性，駕駛實習只佔少於一半課程時數，價錢相比其他院校亦唔算平
不設私家場地練習泊車、掉頭等
不設指定考試場地
車款：無指定
新觀塘駕駛學院 私家車HK$12,608起 / 33堂；貨Van HK$13,118起 / 33堂
優點：
同駕院一樣，設有私家地方練習泊位、掉頭同斜坡開停等等，亦可以同運輸署安排指定日子喺指定嘅油塘區路線考試
設有位於院校裡面嘅中期試安排，令學員可以按自己駕駛嘅表現針對性咁作出改善，先至正式應試
實習課堂每堂為55分鐘
價錢較駕院實惠
缺點：
實習及應試場地只限於觀塘區，其他地區人士未必會考慮
最平嘅自動波私家車全科課程(特選)上堂時間只限星期一至五09:00 – 18:30內指定時間
車款：無指定
香港駕駛學院 私家車HK$13,418起 / 33堂；貨Van HK$15,676起 / 33堂
優點：
「私家車駕駛課程證書」及「輕型貨車駕駛證書課程」被納入持續進修基金認可課程，扣除資助後分別實際只需付$5,122
以合格率高而最廣為人知
實習課堂每堂為55分鐘
港島及新界都設有專屬場地，有私家地方練習泊位、掉頭等等，亦可以同運輸署安排指定日子喺指定路線考試
缺點：
私家車同貨Van收費都係最貴
實習及應試場地分別位於小瀝源、南生圍及鴨脷洲，較為偏遠，其他地區人士未必會考慮
最平嘅私家車「非智專」課程只限星期一至五 19:30 – 22:30上堂，而貨Van則不設「非智專」課程選項
車款：TOYOTA Prius-C私家車、TOYOTA HIACE輕型貨車
