【明報專訊】就快過年，唔少人會換新銀紙封利市，匯豐、中銀香港及渣打銀行噚日起至年三十（2月9日），提供兌換新鈔及「迎新鈔」服務，今日及聽日各銀行部分分行會提早喺朝早8點營業。噚日一大早就有唔少人去銀行排隊換新鈔，3間銀行都話今年人數多過舊年，其中渣打香港區零售網絡主管羅倩兒話，噚日兌換新鈔運作暢順，市民反應較過往熱烈，網上預約配額比舊年增加三成，兌換新鈔嘅預約額已滿，「迎新鈔」仲開放網上預約，而50元銀紙就最多人換。
匯豐今次首推自動櫃員機「迎新鈔」提款服務，客戶即日起至下周三（31日），可以喺旺角、觀塘、屯門市廣場分行嘅理財易中心提取20及50元「迎新鈔」。匯豐噚日話今年換新鈔嘅人較舊年同時段多兩成，首兩日預約名額已滿。今年新增網頁預約換新鈔服務嘅中銀香港就話，已將網上預約名額增加一倍，已經全滿。