【明報專訊】「街市現代化計劃」首個項目香港仔街市經全面翻新後，將分階段投入服務，聽日（26日）有約80個攤檔會正式開業。香港仔街市於2021年11月展開翻新工程，今年3月大致完成。食環署話，街市新增唔少設施，包括設空調及抽風系統嘅獨立儲存室，以暫存清晨分送到街市嘅豬隻屠體。另外，街市2樓會設多用途空間，畀檔主舉辦推廣活動同市民休息區。
有從舊街市重置嘅原檔主話，新街市空間比以前更大，可以容納唔同種類嘅店舖，預計可吸引更多人流，料生意可增長一半或以上。該檔主同時話，因應人流增多，上落貨難度亦增加。
食環署話，街市目前有142個攤檔，其中137個於2月以競投方式成功出租，當中80個分佈喺3個樓層，會率先喺聽日開張。至於大樓內嘅「回收便利點」同熟食中心，就會等相關工程完成後相繼投入服務。香港仔街市開幕典禮將於下月19日舉行，到時就會有更多攤檔營業。