ViuTV原創劇集《IT狗》以輕鬆手法，講述本地IT業界嘅辛酸，自播出後口碑不俗，昨晚 (14日) 一集更有意外驚喜，請來前財爺曾俊華客串演出，為該劇注入一股能量。
在劇中由MIRROR隊長Lokman飾演嘅星之子Tony，與BornHub仝仁齊齊參加《初創有明天》，爭奪50萬獎金發展創新科技，眾人去「數據港」向一眾評委介紹「電子人情支付平台」項目，期間Tony喺電梯內回憶佢嘅發明亦曾得獎，自豪指當年由「華仔」曾俊華喺「數據港」頒獎畀佢時，仲向佢做出韓式心心手勢，佢實牙實齒話呢個手勢係由華仔發明，但BornHub同伴都覺得佢吹水唔抹咀，齊齊話心心手勢係幾年前由韓國人發明先真。
殊不知Tony再喺「數據港」巧遇華仔，Tony即時向華仔推銷：「最近我發明咗一個智能發聲水杯！希望幫到視障或腦退化人士。」一向深得青年人喜愛嘅華仔表示欣賞，又話：「推動創科將來都係靠你哋年輕人啦！」再向Tony做出心心手勢，令Tony 開心到傻，仲襯住千載難逢嘅機會，要求華仔派住心心拍片，公開講呢個手勢係佢發明，再搵彭秀慧飾演嘅評委Cathy Ho 幫手揸機。
「華仔」曾俊華今早喺Facebook上載劇照，並以廣東話發文：「好開心可以參與今次嘅電視劇演出。多謝Bowtie同ViuTV促成今次合作。多謝《IT狗》劇組、曾經同我合作過同一齊逛紐約波士頓嘅導演Lawrence Kan、楊樂文 LokmanYeung、彭秀慧Kearen Pang、Martin同我一齊演出呢一幕。Lokman嘅演技好犀利，大家不妨留意一下。」佢續指，「《IT狗》係ViuTV嘅原創喜劇，內容講述IT人為求出路決定自己創業，希望觀眾睇得開心之餘亦會更加留意社會上嘅創科發展，畢竟好嘅創意同科技可以為社會進步帶嚟關鍵性嘅影響。希望香港可以繼續孕育更多好嘅創意同科技，支持創科意念堅持，前行。」
《IT 狗》暫時播出5集，已經有華仔呢位重量級串星，唔知嚟緊仲有咩驚喜帶畀觀眾呢？
Photo / FB@John Tsang 曾俊華
