【上流寄生族】電影裏的隱喻　窮人無法打破窮宿命嗎？

窮人真係只有「窮」途末路？積臣今次話題就係講《上流寄生族》呢套電影，套戲另外一個賣點就係有南韓「國民影帝」之稱嘅宋康昊，積臣睇過佢之前既作品，對佢演技非常欣賞，所以買飛捧場。而呢套戲高潮不斷，真係好好睇。事先聲明，以下有嚴重劇透，未睇嘅即刻撳「上一頁」呀，唔好咒我劇透死乜乜呀！

【延伸閱讀】樂施會︰去年全球26大富豪身家等於38億窮人財產總和

電影故事大概就係，由宋康昊主演嘅金爸爸一家住喺窮人社區嘅一間半地牢嘅屋，佢哋餐搵餐食餐餐清。富爸爸朴社長就係一間企業老闆，住喺由名建築師設計嘅過萬呎大宅，有管家打理，朴家一家生活優厚。

▲ 金爸爸一家過着餐搵餐食餐餐清日子。

兩個家庭開始交織，係因為金爸爸個仔金基佑要頂替出國留學嘅朋友，做朴家千金嘅補習老師。

窮人上位靠呃

電影有好強烈窮富對比，金家半地牢嘅屋企同朴家過萬呎大宅之別，金基佑第一次進入朴家大宅，電影用第一身鏡頭環繞大宅環境，令身為窮人嘅金基佑「嘩嘩聲」。

▲ 富爸爸朴社長過萬呎大宅，窮人可能一生未能體驗到。

當金基佑獲得朴太太信任後，引薦佢個妹做埋朴家太子爺嘅視覺藝術老師，再不斷施計，踢走朴家司機、老管家，分別由金爸爸、金媽媽頂上，至此，成個金家寄生朴家。而金家終於有穩定收入，食得飽，電話有上網plan用。

去到呢度，其實金家都係靠口甜舌滑，去獲取朴家信任，再繼而以熟人介紹方式，將全家人引薦到朴家，又佯作大家無親屬關係，佢哋所謂專業背景、學歷當然都係偽造堆砌。其實都幾反映社會實照，你識幾多野，有幾多技能都好，識人好過識字，而你能夠擦老闆鞋，上位更快。電影暗示係，窮人脫貧只能一味係靠呃嗎？

▲ 朴社長及其妻子。

窮人富人分野

富爸爸朴社長最唔鐘意就係越界行為，而金爸爸身上一股難以掩蓋的窮苦臭味「越界」，令朴社長鄙視。縱使金爸爸着得幾西裝骨骨，喺朴社長眼中金爸爸只係沐猴而冠。另外，金基佑睇到朴社長同富人家庭開party時，都有問自己能唔能夠融入有錢人圈子？言語間透露佢對自己身份感到自卑，與上流格格不入。電影帶出訊息係，窮人富人是有階層分野的，窮人努力過後能不能進入上流呢？

寄生喺富人家庭，何止得金家。金家喺巧合之下踢爆咗被辭去嘅老管家收埋因避債而「住喺」大宅地牢嘅老公，而老管家亦踢爆金家造假，雙方發生爭執，更搞出人命，咁啱朴社長一家返大宅，搞到金家要急急腳離開。呢一幕，電影遠鏡拍攝金家一家喺滂沱大雨下，由半山大宅，一路由上而下，走過長長樓梯、隧道、斜路，先返到位於窮人社區嘅屋企。窮人最終仍然只能向下游，諷刺味十足。

窮人始終是窮人

電影最後，因為金爸爸身上窮苦臭味，激化咗窮者潛藏的自卑感，造成血腥悲劇，金爸爸殺了朴社長後就逃入大宅地牢，避開警方追捕。金基佑靠摩斯密碼知道金爸爸匿埋喺地牢，佢好開心，但自知無可能喺𠵱家救到佢，所以發奮大個要搵多啲錢，買起間大宅，然後「釋放」金爸爸。但電影鏡頭一轉，成為富人情節只係金基佑嘅幻想。窮人一生只係窮人，寄生的仍然繼續寄生，無機會上游。

或者，金基佑都有自知之明，所以喺內心只能向金爸爸講句「後會有期」，意味兩父子好大機會從此無緣相見。

▲ 金爸爸一家住係窮人社區嘅一間半地牢嘅屋。

【延伸閱讀】不做退休窮老爸　6大陷阱要警覺

 

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。