【消委會指南】電熱水爐應選即熱電熱水爐、儲水式還是速熱式？

 冬天能洗熱水澡是非常幸福的事，因此選購好的熱水爐尤其重要。電熱水爐vs煤氣熱水爐，因為媒氣費現在愈來愈多人選用電熱水爐，當中三種電熱水爐，儲水式、速熱式及即熱電熱水爐都有各自己的優點。究竟你了解電熱水爐原理嗎？維修保養如何做？消委會本次將會介紹以上三款電熱水爐。

電熱水爐三大款式

儲水式電熱水爐

 有儲水箱，開啟電源後要等15至25分鐘先有熱水供應。開啓熱水掣後，就可以直接輸出熱水，而凍水會同時自動注入儲水箱作為補充。儲水式電熱水爐可以分為無排氣管式（unvented type）、花灑式（shower type）；無排氣管式嘅儲水量較大，可以駁多個出水位，但要加設通風設備，所以唔太流行；花灑式儲水量較少，只可以駁一個出水管，因此體積較小，電功率亦較低，價格合理，係最常見嘅熱水爐。

即熱式電熱水爐

 即開即有熱水供應，應詃係最方便嘅熱水爐。由於使用恒溫器來控制出水溫度，毋須預熱，亦冇內置儲水箱。體積較小，但需要較大電力輸出功率，亦要確保有足夠嘅水壓同水量先至適合安裝。

速熱式電熱水爐

 又叫做「速龍」，係第三代電熱水爐，加熱速度比儲水式快，約5分鐘就可以令水溫升至40度；配合環保花灑使用，出水時間就會較長。容量由6L至20L不等，體積唔算大，耗電量比即熱式低，適合大部分樓宇安裝。

消委會電熱水爐報告

 儲水式電熱水爐嘅款式較多，售價合理。選購前，可先參考消委會於2018年10月對有關儲水式電熱水爐嘅測試報告。

 消委會聯同機電工程署，測試市面12款家用儲水式電熱水爐，全部樣本都安全達標。不過，在可持續供應熱水時間測試中，所有樣本無論儲水量多少，持續供應熱水嘅時間（40℃至45℃，每分鐘5公升的水流量）都少於10分鐘。

 耗電量表現上，有6成樣本效能低於標示嘅能源效益級別，表現參差。

各儲水式電熱水爐之效能

電熱水爐安裝、保養、選購前須知

耗電量

 電熱水爐耗電量高，一般家用儲水式、速熱式熱水爐，額定輸入電功率由3,000瓦特起；即熱式電熱水爐要求較大，電功率要7,000瓦特或以上。買熱水爐前，建議先查詢所住樓宇是否設有三相供電或「三相四線」嘅電路系統，再選擇合用嘅款式。

能源標籤

 機電工程署於2000年12月，推出了儲水式電熱水爐嘅自願性能源效益標籤計劃。該計劃採用「級別式」能源標籤，分五個級別，當中以第一級最為省電。

 及後於2008年、2011年分別作出兩次修訂，因此，自願性能源標籤合共有三個階段，以第三階段嘅要求最高。想了解多啲儲水式電熱水爐嘅能源效益，可以參閱機電工程署網頁。

水壓

 無論儲水式、速熱式或即熱式電熱水爐，都一定要有足夠嘅水量供應先可以接通電源。如果水量不足、或水壓低時，為避免水溫過高嘅風險，就有機會燒發熱線。

 即熱式電熱水爐設有水壓掣，購買前應先檢查樓宇的水壓是否符合要求。

 另外，選購儲水式電熱水爐時，應該按家庭成員數目同用量，選擇合適大小嘅熱水爐。一般而言，15公升水量足夠一家四口，太大只會浪費能源。

水溫

 大部分熱水爐均設有水溫調節掣（即恆溫功能），方便用家調校合適水溫。但不同牌子預設嘅水溫有異，選購時應考慮本身需要，如習慣使用較熱嘅水，就可以考慮有較高溫度設定嘅熱水爐。

電熱水爐安裝

 根據水務條例，安裝熱水爐必須由持牌水喉匠負責或督導，大多數熱水爐廠商、代理商都會有呢方面嘅專員。

 安裝前，應確保安裝人員符合資格。另一方面，在連接電源時，電熱水爐嘅電線必須直接由總掣拉電線接駁，唔可以用普通插座或萬能插蘇來取電！而開關掣亦須要裝响浴室門外面。

電熱水爐保養

 使用電熱水爐前，必先肯定有水供應，方可接通電源。仲要定期搵合資格嘅技工檢查熱水爐，如發現水溫忽冷忽熱、有蒸氣、熱水唔正常漏出等問題，就應該馬上停止使用，並要儘快安排維修，以確保使用安全。