《娛壹》喺網上搵到陶大宇新嘅登台片,相信係佢日前返內地演出酒吧騷,着住白色外套、黑色褲、白鞋,貫徹其八、九十年代影星風範,佢問現場觀眾最近有冇留意佢嘅抖音,仲有啲自豪咁話:「最近我嘅抖音裏面有一個現象,我都好詫異嘅,就係點解你哋會鍾意我唱《倒轉地球》嘅呢?我唱歌好好聽咩?」聽到陶大宇咁問,台下嘅內地觀眾即起哄,答佢:「係呀!」有人肯定佢嘅獨門唱腔,陶大宇沾沾自喜:「我唱歌好得意咩?點解要我唱《倒轉地球》嘅?」一首飲歌hit到去宇宙,相信主辦單位都想食住個勢,指定陶大宇再唱佢嘅神曲《倒轉地球》啦!