政情:田北辰孖財爺濕平 $2000幾乎冇剩 - 東方日報
要聞港聞

政情:田北辰孖財爺濕平 $2000幾乎冇剩

陳茂波(右一)用消費券買運動用品,田北辰(右二)側邊睇實。 陳茂波(右一)用消費券買運動用品,田北辰(右二)側邊睇實。
陳茂波(右一)用消費券買運動用品,田北辰(右二)側邊睇實。
買完海鮮 添對跑鞋
市民前日開始可以領取第一期電子消費券,全城都諗緊點樣用盡消費券。相信大家都見到財政司司長陳茂波前日走幾場,晨早去飲早茶,兼做埋侍應送蝦餃,又去咗茶餐廳,之後仲去買體育用品同打咗場友誼波添!有啲場合總有一兩個議員傍住,咁孖住財爺去買體育用品嘅係邊個?原來係田北辰(田二少)。
田二少話自己喺前日攞咗2,000蚊消費券,即日已經使咗1,300蚊買海鮮,下廚煮海鮮餐畀同事食,而剩低嘅700蚊佢都諗住同一日用晒佢,希望可以振興經濟喎。
陳茂波買運動配件
兩人去到荃灣一個商場購物,近來奧運熱潮一浪接一浪,又適逢前日係全民運動日,田二少就買咗對跑鞋,首期消費券剩番80幾蚊,差唔多用晒,而陳茂波就用570蚊買咗運動配件,仲要係加碼消費添!田二少又話佢哋遇到好多街坊,都好熱烈分享點用消費券,認為無論大家係衝動式消費、報復式消費定係日常消費,用得開心就最實際喇!
邵家輝落區打打氣
唔單止財爺同田二少鼓勵市民用電子消費券,啲商販都好緊張係咪可以做多啲生意,而批發及零售界議員邵家輝前日都去咗銅鑼灣,走訪商販同零售店,包括日常生活用品嘅商販、藥房、電器及傢俬、化妝品及運動用品店等,希望為佢哋打打氣,又訪問商戶預期生意,同埋了解吓市民使用消費券嘅情況喎,仲親身試用電子消費券添!
邵話觀察到前日已有市民率先領取並開始喺商戶使用消費券,商販分別透過四個電子支付平台收取消費券過程亦非常順利,市民購物明顯較「爽手」,商戶生意水漲船高,希望真係有助刺激消費啦。邵仲話對比政府上年中派發一萬元現金,今次消費券具時限性,冇得儲起,而唔少商場同商戶亦推出各式各樣優惠招來顧客,估計唔少市民都會喺消費券以外再加碼消費。加上現時正值暑假同東京奧運舉行期間,唔少商場都有宣傳活動,相信都有助帶動人流同消費氣氛嘅。
邵家輝(右)亦到菜檔購物,試用消費券。邵家輝(右)亦到菜檔購物,試用消費券。
邵家輝(右)亦到菜檔購物,試用消費券。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500