陳明恩多謝神賜靚老公

陳明恩（鬼妹）不經不覺入行超過十年，幾年前多得佢個教友王祖藍提攜，令佢憑住劇集《老表，你好嘢！》為人熟悉。不過，原來鬼妹入行之初絕對唔係想拍劇，只係一心想做歌星。

早前，陳明恩返九龍城浸信會，分享佢嘅人生經歷，佢話自己一直好單純，細細個已經想做明星，所以大個走去學唱音樂劇，但踏入樂壇嘅第一刻，就知音樂劇嘅唱腔唔啱香港channel，經過灰心失望再堅持兩年，終於錄到一首歌，點知錄完首歌第二日返公司，公司話要執笠！佢自覺當時好黑仔，事業又未有，又嫁唔出，但最後感到「天父爸爸」有幫佢，畀到佢最好嘅安排；之後，仲賜咗一個靚仔老公畀佢，而「靚仔老公」呢四個字，佢重複咗至少兩次！

聽到東姑好感動之際，佢就歌星癮大發，於是大開金口唱歌畀大家聽，仲搵埋老公Eddy及一個女dancer出嚟做伴舞，兩公婆一唱一跳，十足去教會開個唱一樣。唱完歌，佢又無啦啦甜笑，對住幾百位教友講：「呢個係我老公，我老公係咪好靚仔呢？」佢講完呢句嘢，全場靜止，搞到佢老公勁尷尬，立即轉身一個走先；不過，東姑唔怪鬼妹，畢竟佢哋新婚未夠半年，晒下恩愛好閒啫。

早前，「鬼妹」陳明恩返教會分享佢嘅人生經歷，佢話多謝神，畀咗個靚仔老公佢喎。

陳明恩同老公Eddy（右），近來不時以婦唱夫隨嘅形式表演。

唱完歌，陳明恩立即忍唔住拖一拖老公隻手仔，一秒都要黐實。

陳明恩今年二月嫁畀初戀情人Eddy，婚後一直享受二人世界，話兩年後先計劃生B。

兩公婆都係虔誠嘅教徒，所以行山都去同信仰有關嘅地方。